د افغانستان کرکټ د نولس کلنو ملي لوبډلې کپتان جاوید احمدي وایي که څه هم چې په نړیوال جام سیالیو کې د نړۍ پیاوړې لوبډلې لوبیږي خو هڅه به یې دا وي چې افغانستان د اتو غوره لوبډلو په کتار کې راولي .
د نولس کلنو ځوانانو لوبډلو نړیوال جام سیالۍ به دروان ۲۰۱۲ کال په اکټوبر میاشت کې په استرالیا کې پیل شي او د افغانستان په ګډون شپاړس هیوادونه پکې برخه اخلي .
لس لوبډلې د کرکټ نړیوالې شورا پوره غړیتوب لري او پاتې شپږ لوبډلو د ټاکنیز پړاو له لرې چې په ۲۰۱۱ کال کې ترسره شو لاره موندلې ده .
په نړیوال جام کې لوبډلې په څلورو ګروپونو ویشل شوي دي چې په لاندې ډول دي :
احمدي وایي که څه هم چې کرکټ بورډ د نړیوال جام سیالیو لپاره د یوې پیاوړې لوبډلې د جوړیدو لپاره روزنیز کمپ پیلوي خو بیا هم له کرکټ بورډ څخه غوښتنه کوي چې درې اوونۍ وړاندې استرالیا ته د لوبډلې د استولو په اړه فکر وکړي .
د افغانستان کرکټ نولس کلنو ځوانانو لوبدله به تر نړیوال جام وړاندي د لومړي ځل لپاره په اسیایي جام سیالیو کې ګډون وکړي ، دغه سیالۍ د جون میاشتې په ۲۳ نیټه، په مالیزیا کې پیلیږي او د جولای میاشتې تر لومړۍ نیټې پورې دوام کوي .
د نولس کلنو په اسیایي جام سیالیو کې د افغانستان په ګډون اته اسیایي لوبډلې برخه اخلي چې څلور لوبډلې یې د کرکټ نړیوالې شورا پوره غړیتوب لري
افغانستان، پاکستان، هندوستان،سریلانکا، بنګلدیش، مالیزیا، قطر او نیپال هغه هیوادونه دي چې په اسیایي جام سیالیو کې لوبیږي .
د لومړي ځل لپاره په اسیایي جام سیالیو کې د افغانستان نولس کلنو ځوانانو ملي لوبډلې لوبیدل به د دغې لوبډلې لپاره پخپله یوه ښه روزنه او تجربه وي او دا به ورسره مرسته و کړي څو په نړیوال جام سیالیو کې ښه وځلیږي .
د افغانستان نولس کلنو لوبډلې لوبغاړی افسر ځاځی بیا وایي خوښ دی چې په لومړنۍ لوبه کې به د پاکستان په وړاندې لوبه وکړي او هڅه به یې دا وي چې دغه لوبډله له مخې پورته کړي .
ځاځي وایي د نولس کلنو ځوانانو په لوبډله کې یو شمیر داسې با تجربه او پیاوړي لوبغاړي هم شته دي چې په ملي لوبډله کې لوبیدلي او انشاالله چې د پاکستان او نورو لوبډلو په وړاندې به ښه لوبه وکړي .
د افغانستان کرکټ بورډ اجرایوي مشر ډاکتر حامد شینواری وایي پلان کې لري چې د نولس کلنو ملي لوبډله تر نړیوال جام سیالیو درې اوونې وړاندې استرالیا ته واستوي څو له چاپیریال او نورو شرایطو سره ځان برابرکړي .
