كه زموږ او ستاسې په كوركې لاټين تورې شپې رڼا كوي ، د نړۍ په موزيمونو كې
لاټين د نمونې په ډول ايښى دى. څه موده وړاندې د روسيې په پلازمېنه مسكو كې يوه
موزيم ته تللى وم،د موزيم ټكټ مې واخيست او د ننوتو په كتار كې ودرېدم،
د يوې شېبې د درېدو وروسته موزيم ته وردننه شوم كله چې ورننوتم نو لومړى مې په يوه
ګړي(منګي) چې د كوزې په ډول جوړ شوى و سترګې ولګيدې چې په يوه ښايسته شيشوي المارۍ
كې د نمونې په ډول د خلكو د ليدو لپاره ايښودل شوى و ، دا خو لا څه كوې چې لږ په كې
نور هم ورتېر شوم نو مې لاټين وليد چې په يوه تاويدونكي شيشوي بكس كې تاوېده، د
هغوۍ څنګ ته مې په زرينه المارۍ كې تبۍ او د مزرو څپلۍ وليدې چــــې خلك پرې راپنډ
و ، د خلكو ګڼې ګوڼې نه لرې يوه
كونج ته ولاړم او د هغه ځاى نه مې د دوۍ په ننداره پيل وكړ خلكو ته ډېره جالبه وه
ټوپۍ ټوپۍ خلك هر يوه (منګى، لاټين، تبۍ او د مزرو څپليو) تاريخي اثار ته ولاړ وه
او چرت وړي وه ، ما دا نه ځوروي چې لاټين ، تبۍ ، منګى او داسې نور زموږ د كورني
ژوند اثار په موزيمونو كې ايښودل شوي دي، بلكې دا مې ژړوي چې دا ټول زموږ د ورځيني
ژوند د كارولو عمده شيان دي هغه دا چې ابۍ تبۍ ته ناسته هره ورځ ډوډۍ پخوي، نجونې
هر مازديګر د منګيو سره د ګودره اوبه راوړي، لاټين مو هر تور ماښام تورې شپې رڼا
كوي .
دا هر افغان ته معلومه ده چې په زرګونو نور داسې بېلګې شته چې ښايي نړۍ ته تاريخي
اثار وي خو زموږ د ژوند عمده شيان دي. دا ولې موږ په ۱۵ مه يا ۱۷مه پېړۍ كې اوسيږو؟
ولې خلك زموږه ښه ژوند لري؟
ولې موږ د خلكو په ډول برق، ګاز، نفت او تيل نه لرو؟
ولې په هېواد كې فابريكې نشته؟
ولې موږ ټول عمر د ورور وژنې په رنځ اخته يو؟
ولې مو نوې جامعه د علم او هنر نه لرې په تورو تيارو كې لويږي؟
داسې په زرګونو نورې پوښتنې هم شته چې بې ځوابه دي ؟
