د ذهني او مغزي روغتیا لپاره کتابونه مطالعه او غور پرې وکړئ. وايي چې حد اقل نیم ساعت باید پر مطالعه شویو مطالبو د فکر لپاره ځانګړی کړئ. ځکه ذهنونه چې له تاریخه، د ورځني چال چلند، واقعاتو او له ښو فکرونو بې برخې او نا خبره وي، له ودې، غوړېدا او کاره لوېږي. چې د قضاوت، عیب پلټنې، غلطو فکرونو او د تنګ نظرۍ پر فابریکه بدلېږي.
ډېر خلک کتابونه لولي خو له دې خبرې بې پروا دي، چې هغه څه چې دوی یې زده کوي په یاد ساتل یې خورا اړین دي او باید پاملرنه ور ته وکړي، یوازې د پلټنې او معلوماتو د تر لاسه کولو له لارې زمونږ په یاد کې څه نه پاتې کېږي.
د یادښت په تړاو د الرجِل مجلې د یوه رپوټ له مخې ویل شوي، که مونږ له وړاندې د زده شویو او ذهن ته د سپارل شویو شیانو په اړ لږ غور وکړو بېرته مو یاد ته راګرځي خو که پر دغو معلوماتو غور و نه کړو نو د وخت په تېرېدو به مو هر څه له یاده ووځي.
د دې ستونزې د حل لپاره دوه اسانې لارې دي چې مرسته کوي؛ څو هغه شیان چې تاسو یې زده کوئ د تل لپاره مو په ذهن کې پاتې شي.
وخت پر وخت خپل معلومات وګورئ!
د اوږد مهال لپاره د معلوماتو په یاد ساتلو تر ټولو اسانه او غوره طریقه دا ده، چې وخت پر وخت هغه اوګورئ، تکرار یې کړئ او لوستلو ته یې ادامه ورکړئ.
د بېلګې په ډول؛ تاسو یو کتاب لوستلی دی او د هغه له معلوماتو څخه له ګټې اخستنې سره سره خوند هم اخلئ نو پر ځای د دې چې هغه په داسې یو ځای کې وساتئ چې د لاسرسي وړ نه وي؛ غوره ده په داسې ځای کې یې کېږدئ چې په میاشت کې یو ځل یا درې میاشتو کې یو ځل یا هم هر شپږ میاشتې وروسته مو پر دغه کتاب سترګې ولګېږي. څومره چې تاسو د دغه کتاب په لوري ګورئ ور سره مو په ذهن کې پخواني لوستلي معلومات تازه کېږي.
په همدې ډول هغه معلومات چې تاسو وړاندې لوستي هیڅکله مو نه هېرېږي، بلکې له اوږده ځڼډ وروسته کله چې هغه ته اړتیا پیدا کېږي هغه به ستاسو یاد ته راځي.
د پنځوس پنځوس تګلاره
د معلوماتو د یاد ساتلو په اړه بله غوره لار د پنځوس پنځوس پر تګلارې عمل کول دي.
د دې مطلب دا دی چې، تاسو خپله د زده کړې طریقه او عمل دوه برخې کړئ، په لومړۍ نیمايي برخه وخت کې نوي او تازه معلومات تر لاسه کړئ او پر دوهمه نمیايي برخه وخت کې زاړه معلوماتو تکرار کړئ، له دې لارې کولی شئ د هېرېدو له سترې ناروغۍ ځان وژغورئ.
د بېلګې په ډول پر ځای د دې چې په بشپړ ډول یو کتاب ولولئ، نیمايي کتاب ولولئ او تر لاسه کړي معلومات له نورو سره شریک کړئ یا د لوستل شوې برخې د غورچاڼ پر لیکلو کوښښ وکړئ.
دا طریقه ډېره ګټوره او پر ځای ده، که غواړئ چې زده شوي معلومات مو له یاده و نه وځي نو پر دغې طریقې عمل وکړئ.
ویل کېږي چې د انسان عقل او ذهن لکه ربړ داسې دی، هر څومره چې هغه وغځوې پراخېږي، چې ور سره د زده شوو معلوماتو د ساتنې سربېره د نوو معلوماتو د ځایونې وړتیا یې لوړېږي.
د مطالعې پر وخت د یادښت اخیستل
کله چې مطالعه کوئ، حتماً ځینې مطالب او موضوعات ستاسو پام ور اړوي، فکر کوئ چې دا موضوعات اړین دي تر څو په ذهن کې پاتې شي او پر خپل وخت ترې ګټه واخلئ. کوښښ وکړئ چې دغسې موضوعات له ځان سره په ټلیفون نوټ یا یوه ځانګړې کتابچه کې نوټ کړئ. یادښت شوي لنډ مطالب او جملې کولی شي ستاسو سره د کتاب د ګڼو موضوعاتو او معلوماتو په رایادولو کې مرسته وکړي.
