ټول غواړي، چې په کار ځای کې په ښه توګه راڅرګند شي، ترڅو ډاډ ترلاسه کړي، چې د پرمختګ پوړۍ به ووهي او لوړتیا به ترلاسه کړي. په دې اړه فکر وکړئ، څه باید وکړئ، ترڅو وکولای شئ له نورو څخه پرمختګ وکړئ او د خپل ځان په لوري نظرونه را جلب کړئ؟
زموږ تصور دا دی، چې د نورو په پرتله د پرمختګ لپاره هرومرو باید عجیب او د نه باور وړ کارونه ترسره کړو او تر کومه ځایه چې کولای شو کار وکړو.
یو څه تاسو ته وایم، څه ستاسو په خصوصي او عاطفي ژوند کې او څه هم ستاسو په کاري ژوند کې، یوازې جزئیات مهم دي، دا چې مناسبې جامې واغوندئ، خصوصي ټیلیفونونه مو لنډ کړئ او په ډله ایزو کارونو کې ګډون وکړئ، ښایي ډېر اغېزناک وي.
په دې ځای کې هغو مواردو ته به اشاره وکړو، چې په ترسره کولو سره به یې سل سلنه د رییس د پام وړ وګرځي.
۱ ـــ ښه ظاهر ولرئ
له خپل ځان سره لاسي بکس ولېږدوئ، دا چې هره ورځ له لاسي بکس سره شرکت ته ننوځئ او دغه راز له لاسي بکس سره ترې بهر کېږئ، نورو ته دا احساس ورکوئ، چې تاسو په خپل کار کې فعال یاست، حتا که د خپل کاري مېز تر شا هم ونه اوسئ، شونې ده، چې دا بکس د خپلې غرمنۍ د لېږدولو لپاره په لاس کې ونیسئ، خو ډېر ښه اغېز به ولري.
۲ ـــ سم کېنئ
سم کېناستل، سم او په غرور سره درېدل فزیکي نښې دي، چې څرګندوي، تاسو په خپل ځان باندې د لوړ باور لرونکی فرد یاست، مه پرېږدئ، چې نور تاسو د کمپیوټر پر وړاندې په کړوپ حالت کې وویني، مګر دا چې د اضافه کارۍ په حال کې واوسئ او نور د سم ناستي وړتیا ونه لرئ.
۳ ـــ وخت پېژندونکی واوسئ
د هیچا نه خوښېږي، چې د چا په تمه پاتې شي، نو هڅه وکړئ، چې یو ځای ته په ټاکلي وخت سره لاړ شئ، زه تل خپلو دوستانو ته وایم: «تمه مه لرئ، چې ژر راشم، خو ځنډ هم نه کوم.» وخت پېژندونکی واوسئ.
۴ ـــ خپل خصوصي ژوند په کار کې مه ښکېل کوئ
هغه ښه کار، چې کولای شي یو کارمند یې ترسره کړي، دا دی چې خپل خصوصي ژوند دې له کار څخه جلا کړي، یانې تر کله چې په کار ځای کې دی، نو په بشپړه توګه دې خپل کار ته متوجه واوسي. د بېلګې په توګه: خپل وخت دې په دوامداره توګه د خپلې کوژدنې ټیلیفوني اړیکو ته نه ورکوي.
۵ ـــ اندېښمن مه اوسئ، خوشاله واوسئ
مُسکا کول ساري دي، دا د دې سبب ګرځي، چې نور ډېر کم له تاسو څخه شکایت ولري، په ځانګړې توګه هغه وخت، چې یو ناسم کار مو ترسره کړی وي.
۶ ـــ ښې جامې واغوندئ او خوشبویه څرګند شئ
تل له ځان سره د نعنا خوند لرونکې ژاولې یا جېبي ګومنز ولرئ، چې ډېر ګټور دي، مهمه نه ده، چې نور څه وایي، خو په یاد ولرئ، چې خلک لا هم د افرادو په اړه د ظاهر له مخې قضاوت کوي، نو ښې جامې واغوندئ.
۷ ـــ کار ځای مو پاک او منظم وساتئ
دا چې کاري مېز مو تل منظم او پاک وساتئ او ټولې پاڼې په خپل ځای باندې کېږدئ، یوه ډېره ښه لاره ده، ترڅو خپل رییس په دې باندې پوه کړئ، چې تاسو په ټولو کارونو کې یو منظم فرد یاست.
۸ ـــ ښې خبرې وکړئ
پوه شئ، چې د څه شي په اړه خبرې کوئ
سهارنۍ ورځپاڼه له نظره تېره کړئ، په خپله کاري برخه کې، له نویو پرمختګونو څخه ځان خبر کړئ او په دې باندې پوه شئ، چې په کار کې مو څه تېرېږي، دا چې تل خپل معلومات زیات کړئ، نو په خبرو کولو کې به له تاسو سره ډېره زیاته مرسته وکړي.
۹ ـــ د خبرو کولو پرمهال له خپلو لاسونو څخه هم مرسته وغواړئ
مه وېرېږئ، چې د خبرو کولو پرمهال له خپلو لاسونو څخه مرسته وغواړئ، هرومرو اړینه نه ده، چې یو ایټالیایي واوسئ، ترڅو دا کار په ښه توګه ترسره کړئ، ډېر زیات طبیعي چلند وکړئ.
۱۰ ـــ تل د ویلو لپاره یو ټوکه چمتو ولرئ
که څه هم دا به مو نه خوښېږي، چې د شرکت مسخره واوسئ، خو ښه ده، چې په مناسب وخت کې یوه ټوکه هم وکړئ.
۱۱ ـــ له غیبت کولو څخه ډډه وکړئ
که څه هم کېدای شي یو کار ډېر زیات بوختونکی وي، خو غیبت کول د یوه وژونکي زهر په څېر کولای شي، په چټکه توګه کار مو له لاسه بهر کړي، له دې کار څخه لاس واخلئ او د نورو په شخصي او خصوصي ژوند کې کار مه لرئ.
۱۲ ـــ زده کړئ، چې کله وخت اړینه ده، خبرې ونه کړئ
کله وخت تر ټولو غوره او هوښیارانه کار دا دی، چې صبر وکړئ او خبرې ونه کړئ، که څه هم کله چې د کولو لپاره ارزښتمنې خبرې لرئ، ښه ده، چې په بحث کې ګډون وکړئ، خو که چېرې غواړئ تل په بحث کې د سل کاله مخکې تکراري خبرې وکړئ، نو غوره ده، چې اصلاً هېڅ خبرې ونه کړئ، په دې کار سره حتا شونې ده، چې نور تصور وکړي، تاسو د هغوی د خبرو په اړه فکر کوئ او دا ډېره ښه ده او په یاد ولرئ، چې په یوه بحث کې هېڅکله په نورو باندې چیغې مه وهئ.
۱۳ ـــ باټې مه وهئ
هېڅوک له هغو کسانو سره لېوالتیا نه لري، چې ځان ستاینه کوي او باټې وهي، نو متوجه اوسئ، چې څه وایئ او تل هغه کارونه، چې ترسره کړي مو دي، مه یې ستروئ.
۱۴ ـــ ښه واوسئ او ښه کارونه ترسره کړئ
اضافه کاري وکړئ
که دا چې تل د ډېر کار په لټه کې واوسئ او له رییس څخه د ډېر کار غوښتنه وکړئ او دا ستاسو لپاره د یوه عادت په توګه رامنځته شي، نو ډاډه اوسئ، چې رییس به مو هرومرو دې موضوع ته متوجه وي، په ځانګړې توګه هغه مهال، چې غواړي لوړتیا (ترفیع) درکړي، تاسو به یې په ذهن کې پاتې شئ، د پیسو په اړه یې اندېښنه مه کوئ، هېڅ کړاو او زحمت بې ځوابه نه پاتې کېږي.
۱۵ ـــ هېڅکله یو له همکارانو سره مو مینه ناکې اړیکې ته مه ننوځئ
نه پوهېږم، چې دا نوی منشي څومره امکان لري، چې جذاب وي یا همداسې یو له همکارانو څخه مو، خو سپارښتنه کېږي، چې په لور یې ور نه شئ، دا ښایي له راتلونکو سرخوږیو او د زړه له دردونو څخه مخنیوی وکړي.
۱۶ ـــ تل خپل کنټرول په خپل لاس کې ولرئ
نه وایم له همکارانو سره په بحث کې اصلاً اندېښمن او خواشینی مه اوسئ، وایم هېڅکله خپل کنټرول له لاسه مه ورکوئ، دا چاره د دې سبب ګرځي، چې تر لاس لاندې کسان درته لا ډېر درناوی وکړي او پورته مقام والا کسان به هم تر اغېزې لاندې راشي.
۱۷ ـــ پام مو وي، چې په انټرنېټ کې کوم سایټونه ګورئ او بررسي کوئ
په دې باندې پوه شئ، چې په کاري چاپېریال کې تل باید د کار په فکر کې واوسئ، نو د اوزګارتیا پرمهال هم نباید نا اړوندو سایټونو کې وګرځئ.
۱۸ ـــ کله وخت یو رهبر واوسئ
له دې چې په خاصو وختونو کې د رهبرۍ مقام تر لاسه کړئ، وېره مه لرئ، کله چې یو له پخوانیو همکارانو څخه مو د تقاعد کېدو په حال کې شو، د هغه لپاره د خدای پاماني یوه مېلمستیا جوړه کړئ، تل د دې کارونو لپاره داوطلب واوسئ او په دې کار سره په ډېرې چټکۍ نور له تاسو سره لېوالتیا پیدا کوي.
۱۹ ـــ د شرکت قوانینو او سیاستونو ته درناوی ولرئ
تل په شرکت کې یو لړ قوانین شتون لري، چې کارکوونکي اړ دي، ترې پیروي او ورته درناوی وکړي، نو په یاد ولرئ، چې هېڅکله د شرکت قوانین تر پښو لاندې نه کړئ.
۲۰ ـــ له خپلو همکارانو سره ښه چلند وکړئ
نباید له بریده زیات ټیټ ښکاره شئ، خو د همکارانو د زېږون ورځ او دغه راز د هغوی په اړه د وروستیو خبرونو په یاد لرل به ډېر ښه وي او له تاسو سره به د هغوی لېوالتیا لاپسې زیاته شي.
وروستۍ خبره
تل جزئیات دي، چې ستر انځور جوړوي، د دې کوچنیو مواردو په مراعات کولو سره، وبه کولای شئ چې د خپل رییس او همکارانو پر وړاندې خپل انځور ښه او ستر کړئ، نو هوښیار و اوسئ، چې تاسو د پرمختګ په پوړۍ باندې ولیدل شئ.
