کابل(روهي): واشنګټن پوسټ په کابل کې د هغو افغان ماشومانو ژوند ته کتنه کړې چې په شاقه کارونو بوخت دي.
سرچینه ليکي چې د وروستیو اقتصادي تحولاتو له امله په افغانستان کې د ماشومانو وضعیت د جدي اندېښنې وړ دی، ځکه سلګونه ماشومان په سختو کارونو او خپلې کورنۍ ته د ډوډۍ په پيدا کولو بوخت دي.
سرچینه وايي چې افغان ماشومان د نړیوالې ټولنې پراخو مرستو ته اړتیا لري څو دغه ترینګلی وضعیت پای ته ورسېږي او د افغان تنکیو ځوانانو او ماشومانو ژوند وژغورل شي.
تر دې وړاندې ګڼو نورو نړیوالو رسنیو او بنسټونو هم د افغان ماشومانو پر وضعیت اندېښنه څرګنده کړې وه او په دې برخه کې یې د پراخو مرستو غوښتنه کړې ده.
