.jpg)
کابل (روهي): د چین ولسمشر شي جین پینګ وايي، ګاونډي هېوادونه بايد د افغانانو د ملاتړ لپاره د اجماع د رامنځته کولو او همغږي کولو هڅې وکړي.
هغه دغه څرګندونې د یوه لیکلي پیغام له لارې په چين کې د افغانستان د ګاونډيو هېوادونو د بهرنيو چارو وزيرانو غونډې کړې دي.
شي جین پینګ ویلي:"يو سوله ييز، باثباته، پرمختللى او سوکاله افغانستان د ټولو افغانانو ارمان دى او د سيمې د هېوادونو او نړيوالې ټولنې په ګټه هم دی."
هغه د افغانستان پر ګاونډیو هېوادونو غږ کړی چې د افغانستان د روښانه راتلونکي د رامنځته کولو په برخه کې له خپلو ټولو امکاناتو کار واخلي.
د ده په وینا، دغه هېواد له ډېر وخت راهیسې له ستونزو سره مخ دی او په ډېرو برخو کې پرمختګ ته بېړنۍ اړتيا لري.
دا په داسې حال کې ده چې له تېرې ورځې راهیسې په چین کې د افغانستان د بشري ناورین په اړه د ګاونډیو هېوادونو د بهرنیو چارو وزیرانو غونډه روانه ده.
د چین د بهرنیو چارو وزیر وانګ يي د دغې غونډې مشري کوي او د افغانستان د بهرنیو چارو وزارت سرپرست امیر خان متقي، د پاکستان، ایران، روسیې، تاجکستان، ترکمنستان، ازبکستان، د امریکا متحده ایالاتونو، اندونیزیا او قطر هېوادونو دیپلوماتانو په کې ګډون کړی دی.
