د زړه بدوالی، کانګې کول، د معدې جوشېدل، قبضيت کېدل او د وجود ځينو نورو برخو درد ميرمنې هغه وخت احساسوي چې کله حمل واخلي. له دغه ستونزو وراېخوا د غاښونو درد، غاښونو کې سوري پيدا کېدل او د وريو ميکروبي کېدل د بلاربښت نورې نښې او جانبي عوارض دي.
د روغتيا يا Health په نوم وېب پاڼې د يوې شوې سروې پر بنسټ لېکلي دي چې تر نيمايي ډېرې ميرمنې هغه وخت د غاښونو په ناروغيو اخته کيږي چې کله دوی حمل واخلي. غاښونه يې سوري کيږي، اړې کيږي چې غاښونه وباسي، اورۍ يې ميکروبي کيږي او همدا ډول د خولې په ځينو نورو ناروغيو اخته کيږي. يو شمېر ميرمنو خپلې دا تجربې هم شريکې کړې دي چې د هر ماشوم په حمل سره يې يو - يو غاښ له ميکروبي کېدو او سوري کېدو وروسته اېستلی دی.
د دغه وېب پاڼې د مالوماتو پر بنسټ اوس مهال د نړۍ له ۶۰ بيا تر ۷۵ سلنه پورې ميرمنې د بلاربښت پر مهال د غاښونو ستونزې پيدا کوي. روغتيا پالان دغه ستونزې عامې يادوي خو په ورته وخت کې يې لامل د وجود د ځينو هورمونونو ډېر زيات مصرف په ګوته کوي چې د اميدوارۍ له امله په مصرف رسيږي او په پايله کې يې ځيني ستونزې لکه د غاښونو سوري کېدل او د اوريو ميکروبي کېدنه رامنځ ته کيږي.
څنګه کولی شئ چې د اميدوارۍ پر مهال د غاښونو او اوريو له ناروغۍ ځان وساتئ؟
دې برخه کې د ډاکټرانو توصيه دا ده چې بايد له عادي ډول ډېر د غاښونو خيال وساتل شي؛ غاښونو بورس شي، نېږدې درې مياشتې وروسته يو ځل د غاښونو ډاکټر باندې غاښونه وکتل شي. له دې وراېخوا کولی شئ چې په خپل کور کې دغه لارښوونې پلې کړئ.
- د خوږو شيانو خوراک او څښاک د اميدوارۍ پر مهال بايد را کم شي.
- د اميدوارۍ پر مهال په حتمي ډول په ۲۴ ساعتونو کې بايد د غاښونو په کريم سره دوه ځلې غاښونه پرمېنځل شي.
- له هر خوراک او ډوډۍ وروسته بايد د غاښونو په منځ کې پاتې شوني خواړه لېرې شي.
- که چېرې مو د اميدوارۍ پر مهال اورۍ وينه او ټپ کوي، نو يوه کاشوغه مالګه په يو ګيلاس نيمه ګرمو اوبو کې واچوئ او غاښونه مو پرې ومېنځئ.
- هڅه دې وشي چې د بلاربښت پر مهال ميوې او ترکارۍ ډېرې وخوړل شي؛ ميوې او ترکارۍ نه يوازې د مور په نس ماشوم لپاره د خوړو ښې سرچينې دي؛ د اميدوارۍ پر مهال د وجود د اړتيا وړ خواړه برابروي؛ د حمل پر وخت د غاښونو او اوريو د التهاب او ميکروبي کېدو مخه هم نيسي.
