روهي (نۍ/۲۷ د مرغومي)، د سرچينو د مالوماتو پر بنسټ ولسمشر محمداشرف غني د بلخ دولتي چارواکو ته خبرداری ورکړی دی چې که چېرې نهه کلن ماشوم عبدالروف د انسان تښوونکو له منګولو خلاص نه کړي ټول دولتي چارواکي به له دندو لېرې کړي.
طلوع نيوز په دې اړه لېکلي دي، "د هغه سند پر بنسټ چې طلوع نیوز ته رسېدلی دی، ولسمشر غني ګواښ کړی په هغه صورت کې چې د بلخ امنیتي بنسټونه د عبدالرووف هغه ماشوم د خلاصون لپاره چې ۸۰ ورځې مخکې له مزارشریف څخه تښتول شوی اقدام ونه کړي، د دغه ولایت د ټولو دولتي چارواکو د لېرې کولو حکم به صادر کړي."
تېرې ورځ رسنيو د عبدالروف د موړ هغه وېډیو خپره کړه چې پر ولسمشر يې نيوکې کړې چې حکومت يې د زوی د خلاصون په برخه کې ګړندۍ هڅې نه کوي.
د بلخ يو شمېر اوسېدونکو هم بلخ کې پر امنیتي ځواکونو نیوکې کړې وې، چې د دومره شمېر امنیتي ځواکونو په شتون کې هم، نیږدې درېيو مياشتو کې يې ونه شول کولی چې نهه کلن عبدالروف د انسان تښوونکو له منګولو خلاص کړي.
