روهي (درې نۍ/۲ د مرغومي)، د بلوڅ زدکوونکو ټولنې پخوانۍ مشرې او بلوڅ فعالې کریمه بلوچ مړی د کاناډا په ټورنټو کې موندل شوی دی. د کاناډا پولیسو د پېښې پخلی کړی دی.
پر ټولنيزو رسنيو د کريمه بلوڅ مړینې پراخه غبرګونونه راپورته کړي دي خو تر اوسه څرګنده نه ده چې نوموړې څنګه او د چا له خوا وژل شوې ده. پوليسو د نوموړې جسد د طبي معاينو لپاره لېږلی دی.
د پښتون ژغورنې غورځنګ مخکښ غړي محسن دوړ د کريمه بلوڅ پر مړينې خواشيني ښوودلې ده او پر توېټر یې لېکلي دي چې کريمه بلوڅ د خپلو خلکو د حقوقو غږ پورته کړی وو او په همدې پار وژل شوې ده.
بلوڅستان کې د جمهوريت غوښتونکو ګوند مشر شېر محمد بګټي د نوموړې پر مړينې خواشيني ښوودلې او په توېټر یې د کاناډا حکومت د پلټنو غوښتنه کړې ده.
افغانستان او پاکستان کې پر ټوېټر او فېسبوک د کريمه بلوڅ وژنې د خلکو پراخه غبرګونونه راپورته کړي دي او په اړه یې بېلا بېلې ادعاوې شریکې شوې دي.
