روهي (څلور نۍ/ ۱۲ د لیندۍ)، د ناټو سرمنشي ینس سټولټنبرګ وايي، چې پرون د ناټو د بهرنیو چارو وزیرانو په غونډه کې د افغان امنیتي ځواکونو د ملاتړ پر دوام بحث شوی.
نوموړي له دې غونډې وروسته خبریالانو ته په خپلو څرګندونو کې ویلې، چې لومړی دې د تاوتریخوالي په کمښت او وروسته دې په یو دایمي اوربند هوکړه وشي.
سټولټنبرګ د ناټو د بهرنیو چارو وزیرانو ددې غوندې په پای کې یو کنفرانس ته د خبرو پرمهال وویل: "موږ له طالبانو غواړو چې د لومړي ګام په توګه تاوتریخوالی کم کړي. وروسته غواړو چې د سولې پر یوه موافقه سلا وشي چې اوربند یې هم یوه برخه وي. په لومړي ګام کې دې تاوتریخوالی کم شي، هدف د افغانانو ترمنځ سولهییز حل دی، البته چې هر اړخیز اوربند یې باید یوه برخه وي."
د ناټو سرمنشي د ددې وروستۍ غوښتنې په اړه لا هم طالبانو څه نه دي ویلې، دوی له دې وړاندې په افغانستان کې امنیتي ځواکونه د تاوتریخوالي په زیاتیدو تورن کړې و.
