روهي (جمعه/۱۷ د زمري)، د افغانستان د اسلامي جمعيت ګوند له ادرسه د سولې مشورتي لويې جرګې په اړه دوه بيلا بيلې اعلاميې خپرې شوې دي.
د صلاح الدين رباني په مشرۍ د جمعيت ګوند په اعلاميه کې د طالب بنديانو د خوشي کېدو په اړه د سولې مشورتي لويې جرګې سره مخالفت ښوودل شوی؛ جعلي او نمايشي بلل شوې ده.
په داسې حال کې چې د ياد ګوند مخکښ غړی او تېرو ولسمشريزو ټاکنو ته د همدې ګوند څخه نوماند ډاکټر عبدالله عبدالله د لويې جرګې مشري کوي.
بيا له بلې خوا د عنايت الله شاداب په مشرۍ جمعیت ګوند، چې د عطا محمد نور او يونس قانوني په شمول يو شمېر نورې څېرې په کې راټولې شوې دي، د سولې مشورتي لويې جرګې ملاتړ کړی او هيله يې ښوودلې ده چې دغه جرګه د حکومت او طالبانو ترمنځ بين الافغاني خبرو ته لار پرانېزي.
جمعيت ګوند هغه مهال دوه ټوټې شو، چې د عطا محمد نور په مشرۍ يو شمېر مخکښو غړو د صلاح الدين رباني له مشرۍ سره مخالفت وښوود او عنايت الله شاداب يې ځای ناستی وټاکلو.
