.png)
د همدې لېکنې په لومړۍ برخه کې د امريکا متحدو ايالتو کې د سياسي ګوندونو د تاريخ په اړه يو څه رڼا واچوله. د لېکنې په دويمه برخه کې د ديموکرات او جمهوريت غوښتونکو ګوندونو ترمنځ اصلي بنسټيز توپيرونه او د اختلاف ټکي درته په ګوته کوو. په لويه کې ديموکرات ګوند چپ اړخه لېبرال ګوند دی او بيا جمهوريت غوښتونکی د بددلون ضد يانې محافظه کار ښی اړخ ګوند دی.
۱- اسرائيل:
د متحدو ايالتو په سياست کې داسرائيلو له منځ ته راتګ بيا تر نن ورځې د ملاتړ پالېسۍ شتون لري. د ديموکرات ګوند پالېسي دا ده چې اسرائيل بايد د يو يهود دولت په ډول رامنځ ته شي او فلسطنيان دي هم په خپله ځان ته اداره شي. خو بيا جمهوريت غوښتونکی ګوند د اسرائيلو او فلسطين د مسالې په اړه ډېره ښکاره پالېسي نه لري او په دې برخه کې يې سياست ګونګ دی.
۲- ايران:
د ديموکرات ګوند غړی او پخوانی ولسمشر بارک اوباما په دې نظر وو چې د ايران اټومي پروګرام دې مهار شي خو په ورته وخت کې يې پر ايران د اقتصادي بنديزونو د کمولو سياست درلود. د جمهوريت غوښتونکو سياست بيا د ايران پر وړاندې ډېر توند دی. لکه په خپله ولسمشر ټرمپ د ايران اټومي پروګرام د متحدو ايالتو ملي امنيت ته ګواښ ګڼي او پر وړاندې يې د سختو اقداماتو پالېسي لري.
۳- د اقليم بدلون:
ديموکرات ګوند اقليم بدلون ګواښ ګڼي. د ديموکرانانو په اند د اقليم بدلون به د امريکا متحدو ايالتو پر اقتصاد، د وګړو پر روغتيا او لويه کې په چاپيريال منفي او ډېر بد اغېز وکړي. جمهوريت غوښتونکي بيا د اقليم په بدلونه باوري نه دي او دا مساله جدي نه نيسي. جمهوريت غوښتونکي د اقليم د بدلون په د ملګرو ملتونو او نورو نړيوالو سازمانانو راپورونو ته د شک په سترګه ګوري. د امريکا جمهوريت غوښتونکی ګوند د نړيوال اقليم بدلون يوازې د محتدو ايالتو مسووليت نه ګڼي او په اړه يې جدي اقدامات هم نه کوي.
۴- کډوال:
د کډوالو په برخه کې ديموکراتان د يو منظم پلان غوښتنه کوي او د وړانديز کوي چې متحدو ايالتو کې نېږدې ۱۱ مېلېونه بې سندونو کډوالو ته بايد اسناد ورکړل شي، خو جمهوريت غوښتونکي بيا د کډوال له بهير سره مخالف دي. ولسمشر ټرمپ د مکسطکو سره په دې پار ديوال جوړوي، چې د کډوال مخه پرې ونېول شي.
۵- همجنسګري:
ديموکرات ګوند د ښځې له ښځې سره او نارينه له نارينه سره د واده کولو او جنسي اړيکو ملاتړ کوي، جمهوريت غوښتونکي بيا له همجنسګرۍ سره مخالفت لري او غندي يې.
۶- ماليات:
جمهوريت غوښتونکی ګوند د مالياتو د لوړولو مخالف دی او د ديموکرات ګوند هغه طرحه چې بايد له لوړو عوايد لرونکو ډېره ماليه واخېستل شي مخالفت ښيي.
۷- غړي:
ديموکرات ګوند ۴۴ مېلېونه غړي لري او د جمهوريت غوښتونکي ګوند د غړو شمېر ۳۳ مېلېونه ته رسيږي. (۲۰۱۷).
۸- پوځي لګښت:
ديموکرات ګوند هڅه کوي چې د متحدو ايالتو پوځي لښګتونه راکم کړي خو بيا جمهوريت غوښتونکي د پوځ د غښتلتيا پالېسي لري.
۹- تاسيس:
جمهوريت غوښتونکی ګوند په ۱۸۵۴ او ديموکرات ګوند په ۱۸۲۴ کې تاسيس شوی دی.
۱۰- وروستي ولسمشران يې:
بارک اوباما د ديموکرات ګوند نوماند وو او اوسنی ولسمشر دونالډ ټرمپ د جمهوريت غوښتونکي ګوند څخه نوماند وو چې په ۲۰۱۶ کې يې ټاکنې وګټلې.
