روهي (پنځه نۍ/۲۱ د وري)، د فريد خوځون په نوم د عبدالله عبدالله وياند رسنيو ته ويلي دي، چې د محمد اشرف غني او عبدالله عبدالله ترمنځ د ټاکنو پايلو پر سر د راپورته شوې کړکېچ د حل هڅو تر اوسه پايله نه ده ورکړې.
خوځون وايي چې که چېرې د کړکېچ د حل هڅې بې پايلې شي او ولسمشرۍ ماڼۍ د دوی (ټول - ګډ حکومت) طرحه ونه مني، نو عبدالله عبدالله به خپل کابينه او د واليانو ټاکېدل پيل کړي.
له بلې خوا ولسمشر غني د سياسي کړکېچ د حل لپاره پنځه ورځې وخت ورکړی وو چې نوې ټاکنې به نه کوي، خو د ياد وخت له پوره کېدو يوه ورځ وړاندې يې نن ورځ فضل محمود فضلي د يو فرمان پر اساس د چارو ادارې لوی رئيس وټاکلو.
عبدالله عبدالله له ولسمشر غني غواړي چې د لومړي وزير په صلاحيت د اجرائيه رياست څوکي، د وزيرانو شورا او سولې مشري او سياسي واک کې تر ۴۰ سلنه ونډه ورکړي، چې ولسمشرۍ ماڼۍ تر اوسه ور سره نه ده منلې.
