د روغتیا نړیوال سازمان تازه په یو راپور کې ویلي دي، د کرونا ویروس په ټولو سیمو کې خپریږي. دغه سازمان هغه راپورنه رد کړي چې ګواکې کرونا ویروس په ګرمه هوا کې نه خپریږي.
دغه سازمان یو ځل بیا سپارښتنه کړې ده چې تر دې دمه یوازې په مکرر ډول د لاسونو وینځل ددغې ناروغۍ په مخنیوي کې مرسته کوي.
د ډاکترانو په وینا، په مکرر ډول د لاسونو وینځلو سره هغه ویروسونه چې په لاسونو کې وي له منځه ځي.
سړه هوا یا هم د واورې اورښت د کرونا ویروس له مینځه نشي وړلی
د روغتیا نړیوال سازمان همداراز وایي، هېڅ دلیل او ثبوت شتون نه لري چې وښيي چې سړه هوا دې وکولی شي د کرونا ویروس ووژني، د انسان نورماله حرارت درجه د بیرونۍ تودوخې پرته د 36.5 څخه 37 درجو پورې ده.
په ګرمو اوبو لامبل هم ددغې ناروغي مخه نه نیسي
په ګرمو اوبو لامبل تاسو سره د کرونا ویروس په مخنیوي کې هیڅ مرسته نشي کولای، ستاسو د بدن نورماله حرارت درجه د اوبو د ګرموالي او یخوالي سره سره د 36.5 څخه 37 سانتي ګرید درجو پورې ده.
د کرونا ویروس د حشراتو د چېچلو له لارې نه انتقالیږي
د روغتیا نړیوال سازمان دا هم ویلي دي چې تر دې دمه هیڅ معلومات یا هم شواهد شتون نلري چې کرونا ویروس دې د حشراتو د چیچلو له لارې انتفال یا هم خپور شي.
کرونا هغه ویروس دی چې په ابتدايي ډول د خولې د لاړو یا هم د پوزې د څاڅکو له لارې لیږدول کیږي. نو، له هغو کسانو څخه ځان وساتئ چې ټوخیږي.
په الکولو یا هم په کلورینو ځان وینځل هم ددغه ویروس مخنیوی نشي کولی
الکول او کلورین ستاسو په بدن پراته ویروسونه نشي وژلی، برعکس، د الکولو او کلورینو استعمال ستاسو بدن ته زیان رسوي.
البته، دا په پام کې ونیسئ چې دواړه، الکول او کلورین د سطحې غیر منتن کولو لپاره ګټور ثابت کیدی شي، مګر باید د مناسبو سپارښتنو لاندې وکارول شي.
په مالګینو اوبو په منظم ډول د پوزې وینځل هم د کرونا ویروس په مخنیوي کې مرسته نشي کولی
د روغتیا نړېوال سازمان وایي، هېڅ داسې شواهد شتون نه لري چې په منظم ډول په مالګینو اوبو سره د پزې مینځل به خلک له کرونا ویروس خوندي کړي.
که څه هم ځینې محدود شواهد شتون لري چې په منظم ډول په مالګینو اوبو سره د پزې مینځل د عادي زکام په مخنیوي که مرسته کوي، خو د کرونا ویروس څخه په مخنیوي که تاسو سره مرسته نه کوي.
ووږه هم د کرونا ویروس په مخنیوي که رول نه لري
که څه هم ووږه صحي خواړه دي خو په هرصورت، تر دې دمه هېڅ شواهد شتون نه لري چې ووږه دې د کرونا ویروس څخه مخنیوی وکړي.
د هر عمر انسان په دغه وېروس اخته کېدلی شي
د هر عمر انسان په کرونا اخته کیږي، خو د زاړه عمر خلک او یا هم هغه وګړي چې د زړه، ساه لندۍ او یا د شکر ناروغي ولري، له دغه ویروس ډیر زیان منونکي دي.
د انټي بیوټیکو استعمال هم د کرونا وېروس پر وړاندې کار نکوي
انټي بیوټیک یوازې تاسو سره د بکتریاو د له مینځه وړلو کې مرسته کوي، نو په همدې بنسټ، انتي بیوټیک باید د کرونا له مینځه وړلو په خاطر استعمال نشي.
