روهي(پنځه نۍ/۱۵ د کب)، د روسیې ولسمشر ولادمیر پوتین د دې هېواد په اساسي قانون کې د یو شمېر بدلونونو وړاندیز کړی دی. په دې لېست کې یو وړاندیز دا هم دی چې د روسیې وګړي به د اساسي قانون له مخې اړ وي چې پر خدای د ایمان لرلو اعتراف یا اعلان وکړي
دا د روسیې د ولسمشر په توګه د ولادمیر پوتین څلورمه دوره ده، او دی له تېرو ۲۰ کالو راهیسې د روسیې یوه مهمه سیاسي څېره ده. چې مخالفینو وایي، ولسمشر پوتین غواړي په دې ګامونو سره د خپلې ولسمشرۍ مودې له ختمېدو وروسته هم واکمن پاتې شي. یو بل وړاندیز د همجنسه وګړو خپلو منځو کې د واده په اړه دی. د دې وړاندیز له مخې به له نارینه سره د نارینه، او همدا راز له ښځې سره د ښځې واده په اساسي قانون کې منع وبلل شي.
په یوه بل وړاندیز کې راغلي چې "د روسیې خاوره" به بهرنیانو ته نه پرېښودل کېږي. که دا وړاندیز ومنل شي نو د کریمیا په څېر سیمو باندې به د روسیې دعوه او ولکه نوره هم ټینګه شي.روسیې په ۲۰۱۴ کال کې په پوځي ځواک د کریمیا سیمه له ختیځ اوکراین نه بېله کړې وه.
