روهي (دوه نۍ/۵ د کب)، ټاکل شوې ده چې افغان ولسمشر محمد اشرف غني په همدا اوونۍ د پنجشنبې په ورځ د بيا ځلې ولسمشر په توګه لوړه وکړي. ولسمشر د يو فرمان پر اساس د لوړې مراسمو لپاره ځانګړی کمېسيون ټاکلی دی.
د کمېسيون چارې د بغلان ولايتي شورا رئيس غلامبهاءالدین جیلاني او سيمه ييزو ارګانونو ادارې مشر متین بیک ته سپارل شوې دي. ياد کمېسيون به د همدې روانې اوونۍ دننه د لوړې مراسمو لباره تياري بشپړ کړي.
د بهرنيو چارو وزارت چارسمبال وزير او سياسي مرستيال هارون چخانسوري، د ولسمشر سلاکاران وحید عمر او شاه حسین مرتضوي، د وسله وال پوځ لوی درستيز بسمالله وزیري، د ملي امنيت شورا سياسي او ولسي مرستيال وحیدالله قتالي او د چارو ادارې سرپرست الهام عمر هوتکی د دغه کمېسيون غړي تاکل شوي دي.
ولسمشر په داسې وخت کې د لوړې مراسم تر سره کوي، چې ډاکټر عبدالله عبدالله موازي حکومت اعلان کړی او ويلي دي چې د واليانو او سرپرست وزيرانو له ټاکل کېدو وروسته به دی هم د ولسمشر په توګه لوړه وکړي.
