روهي (درې نۍ/۱۵ د سلواغې)، د اسلامي هېوادونو کنفرانس تېره ورځ د سعودي عربستان په پلازمېنه رياض کې ناسته درلوده؛ د فلسطين او اسرائيلو لپاره يې د متحدو ايالتو ولسمشر دونالډ ټرمپ طرحه رد کړه.
د دغه کنفرانس غړو هېوادونو يو شمېر مشرانو د نړۍ له اسلامي او د دغه سازمان له فړو هېوادونو غوښتي دي، چې د ټرمپ د طرحې په پلي کېدو کې خنډ شي.
د اسلامي هېوادونو کنفرانس په يوې اعلاميې کې ويلي دي چې د اسرائيلو او فلسطين ترمنځ د ولسمشر ټرمپ د سولې نومي طرحه يو اړخيزه ده، اسرائيلو ته په کې ځواک ورکړل شوی او د فلسطينيانو حقونه په کې له منځه تللې دي.
د اسرائيلو او فلسطين لپاره د سولې په نوم د ټرمپ طرحې د نورو برخو ترڅنګ، بيت المقدس چې د نړۍ د مسلمانانو سپيڅلی ځای دی، د اسرائيلو د پلازمېنې په توګه پېژندل شوی دی.
