روهي (دوه نۍ/۷ سلواغې)، د ملي امنيت پخواني رئيس او د ولسمشر محمد اشرف غني په مشرۍ د دولت جوړونکي ټيم لومړي مرستيال امرالله صالح د پښتون ژغورنې غورځنګ مشر منظور پشتين د نېونې په اړه غبرګون ښوودلی.
صالح پر خپل ټوېټر ليکلي دي، چې بند خونه کې مې د منظور پشتين له خندا او ارامتيا ډک او د پاکستاني پوليسو د ويرې او ترس انځور ولېد.
صالح وړاندې ليکلي "دغه انځور تاريخ راخېستی دی. دغه انځور ۱۹۷۱ کال ښوودنه کوي." (۱۹۷۱ کال کې بنګلادېش له پاکستان جلا شو چې دلته د امرالله صالح اشاره د پښتونخوا خپلواکۍ ته ده.)
صالح په اخير له منظور پشتين د ملاتړ ويلي دي او د نوموړي د ژر خوشي کېدو هيله يې ښوودلې ده. د يادونې ده چې ولسمشر محمد اشرف غني هم د منظور پشتين پر نېونې خواشني ښوودلې او د خوشي کېدو غوښتنه يې کړې.
