روهي (څلورنۍ/۲۸ د وږي)، سرچينې وايي چې د افغانستان د کرکټ بورډ مشر عاطف مشعل به همدې څو ورځو کې خپله دنده خوشي کړي او ښايي چې د بورډ اوسنی مرستیال عزیز الله فضلي يې ځای ناستی وټاکل شي.
د کرکټ بورډ دننه يو شمېر سرچينو بي بي سي ته ويلي دي، چې عاطف مشعل به په يوې بلې دولتي دندې وګمارل شي او د کرکټ بورډ مشرۍ خوشي کوي.
افغان حکومت او کرکټ بورډ په دې اړه تر اوسه په رسمي ډول څه نه دي ويلي، خو سرچينې باوري دي، چې د کرکټ بورډ دغه تغير او تبديل په همدې ورځو کې رامنځ ته کيږي.
تېره ورځ د عاطف مشعل مشر ورور لطف الله مشعل هم پر خپلې فېسبوک پاڼې له عاطف مشعل څخه غوښتنه کړې وه، چې دغه دنده خوشي کړي او پر ځای يې د حکومت دننه بل چېرې چوپړ وکړي.
