(روهي ـ ۱۳۹۷لمریز،غويي۱۵مه) د افغانستان د ازاد رزمي مبارزو وتلي لوبغاړی عبدالعظیم بدخشي نن ماښام خپل روسي سیال ډنیس کاناکوف سره لوبه لري.
په راپورونو کې راغلي، چې دغه لوبه به د ابسولیوټ چمپینشیپ برکوټ په چوکاټ کې د روسیې په پلازمېنه مسکو کې ترسره کېږي.
ویل شوي، دواړو لوبغاړو د ازادو رزمي مبارزو په ګڼ شمېر سیالیو کې برخه اخیستي دي او د دواړو په ریکارډو کې ۸ بریاوې او یوه ماته شامل دي.
بدخشي په تولنیزو شبکو کې د یو ویډیو په نشرولو سره له هېوادوالو نه د دعاګانو غوښتنه کړی ده.
هغه له دې وړاندې د هند د سوپر فایټ لیګ په سیالیو کې خپل هندي، کاناډایي، الماني، او صربستاني سیالیانو ته ماتې ورکړې ده.
په امریکا کې د ازادو رزمي مبارزو په سیالیو کې د افغانستان بل وتلي لوبغاړي سیر بهادر زاده هم تېره میاشت وتوانید خپل برازیلي سیال ناک اوټ کړي.
