(روهي ـ ۱۳۹۶لمریز،کب۲۹مه) د افغانستان کرکټ بورډ اداره وايي، د کرکټ ملي لوبډلې لوبډلمشر اصغر ستانکزی، بېرته لوبډلې ته ستون شوی.
نوموړی څه موده وړاندې د اپنډیکس د عملیات له امله له لوبډلې لرې شوی و اوس بیرته له لوبډلې سره یو ځای شوی دی.
ویل شوی، چې ستانکزی د افسر ځاځي پر ځای چې پرون د لوبډلې د تمریناتو په لړ کې ټپي شوی و، د نړیوال جام د غوراوي پړاو په روانو سیالیو کې د افغانستان د لوبډلې په نوملړ کې راشي.
د افغانستان کرکټ ملي لوبډله د نړیوال جام د غوراوي سیالیو په لړ کې نن سې شنبه د عربي متحده اماراتو له لوبډلې سره مخ کېږي.
دا په داسې حال کې ده چې افغان لوبډله د شپږ غورو لوبډلو په ډله کې خپل لومړنی بریا د ویسټ انډیز پر وړاندې ترلاسه کړه.
