(روهي ـ ۱۳۹۶لمریز، مرغومي۲۱مه) د کرکټ د نړیوالې شورا خبر ورکړی، چې په لومړۍ درجه لوبو کې، د افغان لوبغاړي محبوب بهیر د بیټنګ اوسط تر بل هر لوبغاړي لوړشوی دی.
ښاغلی بهیر اتلس کلن دی، چې د افغانستان د نوولس کلونو په ټیم کې لوبه کوي.
ویلي شويو چې د بهیر اوسط یوسل او یوویشت اعشاریه اووه اویاو ته رسېږي.
تر ده وړاندې د نړۍ په توپ ویشتونکو کې تر ټولو د اسټرالیایي لوبغاړي برادمن اوسط زیات و، د هغه اوسط پنځه نوي اعشاریه څوارلس دی.
د نوولس کلونو نړیوال جام د شنبې په ورځ په نیوزیلنډ کې پیلېږي او ډېر افغانان تمه لري چې محبوب بهیر به په دې نړیوالو لوبو کې ښه وځلېږي او ویاړونه به د افغانانو په برخه کړي.
