(روهي ـ ۱۳۹۶لمریز، مرغومي ۱۶مه) د اسټرالیا بېګ باش کرېکټ سیالیو کې افغان لوبغاړي محمد نبي عیسی خېل ښه توپ وهنه کړې ده.
محمد نبي د مېلبورن رېنېګېډز لوبډله سره لوبه کوي.
هغه په ۳۰ توپونو د دوو شپږيزو او دوو څلوریزو په مټ ۵۲ منډې وکړې.
ویل شوي، چې نبي له دې وړاندې په توپ اچونه کې هم ښه ځلېدلی و او په څلورو اورونو کې یې ۲۷ منډې ورکړې وې او یو لوبغاړی یې سوځولی و.
په دغو سیالیو کې محمد نبي لومړۍ نیمه سلیزه هم وهلې ده.
په تېرو لوبو کې محمد نبي ته یوازې یو ځل د توپ وهنې فرصت برابر شوی و او هغه هم په اتمه شمېره توپ وهنې ته استول شوی وو، خو ننۍ لوبه کې کپتان ارون فېنچ دی په پنځمه شمېره توپ وهنې ته واستاوه.
نوموړي له دې فرصته ګټه واخېسته او د توپ اچونې تر څنګ یې د توپ وهنې په ډګر کې هم خپل کمال وښود.
د نبي تر څنګ راشد خان هم په سږني بېګ باش سیالیو کې تر دې دمه ښه ځلېدلی او په څلورو لوبو کې یې ۸ لوبغاړي سوځولي.
