د انسانانو د بریالیتوب او نېکمرغۍ تر ټولو لوی دښمنان منفي احساسات او د هغوی ډولونه دي. مثبت احساسات وړتیا بخښونکي دي، خو منفي احساسات وړتیا اخیستونکي دي.
د دې لپاره، چې وغواړو خپلې موخې او بریالیتوب په لاس راوړو، نو وړتیا یا قدرت ته اړتیا لرو او دا وړتیا یوازې په مثبتو احساساتو ټینګېدلای او لاس ته راتلای شي.
منفي احساسات د دې لامل ګرځي، چې ټوله وړتیا مو له منځه لاړه شي، نو لومړنی ګام دغه دی، چې د منفي احساساتو له زیان څخه ځان خلاص کړو او خپله وړتیا، انرژي او وخت د خپل پرمختګ، بریالیتوب او موخو ته د رسېدو په لاره کې په کار واچوو.
په ټوله کې یو قانون شتون لري، له هر شي سره، چې وغواړو مبازه وکړو پیاوړي کېږو، منفي احساسات هم همدا شان دي، که وغواړئ مبارزه ورسره وکړی پیاوړي او لا پیاوړي کېږئ، نو اړینه ده، چې له یوې ښې لارې څخه ګټه پورته کړو.
یو کوچنی نیالګی په نظر کې ونیسئ، چې نوی یې سره له خاورو راپورته کړی وي، په پیل کې ډېر سست او ماتېدونکی دی، یو پیاوړی باد او څاروي کولای شي په ډېر اسانۍ یې له رېښې سره یو ځای راوباسي او له منځه یې یوسي، خو کله، چې ورو ورو په وده پیل کوي او یوې پیاوړي ونې ته بدلون مومي، نو کېدای شي په اسانۍ یې له رېښې سره یو ځای راوباسو؟ نه
منفي احساسات هم همدا شان دي، په پیل کې ډېر کمزوري دي او په اسانۍ سره کولای شو له منځه یې یوسو، خو که پاملرنه مو ورته ونه کړه یا مو ارزښت ورنه کړو، ورو ورو په وده پیل کوي او وړتیا اخلي او په پای کې داسې ځای ته رسېږي، چې کولای شي له فېزیکي، روحي او ذهني اړخه موږ له منځه یوسي، نو ښه اند او نظر دغه دی، چې په پیل کې یې کابو کړو او د منظمو لارو چارو له مخې یې په ښه توګه له منځه یوسو.
