زه له ۱۳۴۰ کال څخه تر اوسه پورې په خپل ژوند کې يوه ټکي ته ډېر زيات په پرله پسې توګه ځير شوی يم، هغه دا چې :
هر څوک ( نر، ښځه ؛ ځوان، پېغله ؛ زوړ او ؤړ ) چې په : غږيزو، تصويري او چاپي ټولنيزو رسنيو کې، لکه : راډيو، ټلوېزيون، سينما ګانو، فلمونو، تياترونو، سرکسونو، نندارو، ورځپاڼو، جريدو، مجلو (مطبوعاتو) کې کار کوي، د هغوی مسلک، هغوی ته د ټولنې په وړاندې ډېر زيات مصنوعي او قُلابي شُهرت وربخښي!
زه، د: افغانستان، ايران، پاکستان، هندوستان، تاجکستان، اوکراين، روسيې،( « شوروي اتحاد » )، فرانسې، ترکيې، عراق، ايطاليې، يونان، عربستان، مصر، انګلستان، نيپال، چين، د امريکې د متحدو ايالتونو ډېر کسان د همدغه : ادبي، کلتوري، هنري، نشراتي، اطلاعاتي،تبليغاتي قشر څخه پېژنم !
د دې خبرې معنی دانه چې په نړۍ کې او د نړۍ په ټولو هېوادونو کې يوازې همدغه د مطبوعاتو او نشراتو ( د ټولنيزو رسنيو ) د برخې کارکوونکي ( نرينه او ښځې ) د فوق العاده او ممتاز استعداد څښتنان دي او دا نور وګړي بې استعداده ( او په اصطلاح :هسې خوشې شوده ګان او بېړاګان دي !!؟؟
زما په اند او ګومان د مطبوعاتو او نشراتو ( غږيزو او تصويري رسنيو ) کارکوونکي د خلکو ( پرګنو ) د غوږو او سترګو له لارو د پرګنو: ذهن، هوښ، شعور، درک، زړونو او روحونو کې کرار کرار ؛ ورځ تر بلې پسې حک کېږي او هر مطبوعاتچي په پای کې داسې له خپل ځان څخه په خود خواهۍ او کلانکارۍ کې، لکه: يوناني او افسانوي اسطوره ؛ هېر ـ ورک شي او له ځان سره د شُهرت او غرور په شا توري دلدل داسې پروازونه کوي، چې د ټولنې عادي او غېر مطبوعاتچي قشرونه ورته داسې ښکاري، لکه د امريکې د متحده ايالتونو پانګوالو، مېلياردرانو او بانکيرانو ته چې عادي کاريګران، د ځمکو خړه کي بزګران، د ټولنې خواريکښان او زيار اېستوونکي تش په نامه انسانان برېښي !!
که زما خبره او نظر غلط وي ؟ نو تاسې د بېلګې په ډول : د « بي بي سي راډيو ـ ټلويزيون »، « د امريکې غږ اشنا راډيو ـ ټلوېزيون »، « د « ناتو ـ ايساف » د راډيو : «د آزادۍ راډيو »، « د دوچوېل المان » : ( د المان غږ خپرونه»، « د طلوع »، « آريانا »، « شمشاد »، ژوندون»، « خورشيد »، « لمر »، « لومړی کانال »، « ملي راډيو ـ ټلوېزيون » او داسې نورو راډيوګانو ـ ټلوېزيونونو، د « افغان فلم »، د « افغان تياتر »،« هاليوډ » او « باليوډ » سينمايي ستورو ته پام وکړئ !
دوی خپل ځانونه داسې ګڼې لکه چې دوی اصلاً د دې خاورينې کُرې انسانان بېخي ونه اوسېږي، بلکې له( ۵ـ ۷ )آسمانونو څخه په بُراق او يا دلدل سپاره ـ را کښته شوي اوسېږي او موږ ( عادي وګړو ) ته داسې ګوري، لکه دوی چې دېوان اوسېږي او موږ ورته بې وزله او بې وسه مېږيان برېښوو!!؟؟
عزيز تحريک
