د لوي او بخښوونكي خداي په نامه
پښتون پوسټ ورځپاڼه
سرليكنه (اداريه )
د ولسمشرۍ دپاره کانديد ډاکټر عبدالله چې د اگست د شلمې نېټې په ټاکنو کې د کرزي په پرتله کمې رايې گټلي په کابل کې د خپلو پلويانو خپلې غونډې ته يې څرگنده کړې، چې انتخابات دې بيا ترسره شي او زه به د خپلو خلکو د برخه ليک د ټاکلو لپاره مبارزه کوم، چې يو سالم حکومت رامنځته شي د خلکو د حقوقو د دفاع لپاره به په ارام نه کښېنم ډاکټر عبدالله څرگنده کړې، چې د اوسني حکومت هغه چارواکي پرېنږدي، چې د افغانانو د برخه ليک لوبې وکړي دې ډول خلکو د افغانستان خدمت نه دى کړى او وروستى کار يې درغلي ده، چې له بده مرغه افغانستان يې بدنام کړ نو بايد انتخابات بيا ترسره شي د انتخاباتو د خپلواک کميسون مرستيال داود نجيفي څرگنده کړې، چې دا د افغانانو حق دى، چې د خپل برخه ليک لپاره پرېکړه وکړي او خپله لاره په خپله وټاکي دا د کانديد حق نه شي کيدلاى، چې پر خلکو خپل نظر وتپي د سياسي کارپوهانو په نظر ډاکټر عبدالله په دې وړانديز يواځې هغه خلک پوهيږي، چې د هېواد او افغانستان د امنيت او د هېواد د رغونې چارې نه غواړي که چيرى په افغانستان کې دوه يم پړاو ټاکنې وشي دا به د افغانستان د ولس لپاره ستر اقتصادي تاوان وي او بله دا، چې د افغانستان سياسي حالات د اگست د شلمې نېټې ټاکنو ته چمتو نه و نو د دوه يم ځل ټاکنو دپاره خو د هېواد اوسني سياسي حالات بالکل برابر نه دي د غزني او ځنې نورو ولايتونو قومي مشرانو خوا لاوړاندې خپل غبرگون ښودلى او څرگنده کړې يې ده، چې مونږ به په دوه يم ځل ټاکنو کې برخه وانه خلي او امنيتي ستونزې هم د هېواد په بېلابيلو برخو کې زياتې شوي دي دا، چې د اگست د شلمې په ټاکنو کې حامد کرزي ډېرې رايې گټلي نو بايد، چې په سمدستي توگه ومنل شي ځکه د افغانستان زياترو خلکو د اگست په شلمه په سختو امنيتي پېښو کې خپله رايه وکاروله دا، چې وروسته د چا له خوا درغلي وشوه دې کې افغان ولس ملامت نه دى افغان ولس خپله پرېکړه کړې او دخپلې خوښې کانديد ته يې رايه ورکړې افغان ولس دې پرېښودل شي، چې د خپلې رايه او دحق په رڼا کې خپل برخه ليک وگوري، دا چې کوم کانديد ځان ناکام گڼي او وايي، چې نه دا درغلي شوې او يو ځل بيا دې ټاکنې وشي نو دا د افغانستان د ولس او هېواد اقتصاد او سياسي حالاتو نه جبرانيدونکى زيان دى.
qadirandewal@yahoo.com
Pakhtoonpost@gmail.com
