د لوي او بخښوونكي خداي په نامه
پښتون پوسټ ورځپاڼه
سرليكنه (اداريه )
د افغانستان پوهنې دوزارت د مهال ويش له مخې په گرمو سيمو کې نوى ښوونيز کال پيل شوى چې ورسره د پاکستان د پښتونخوا په ايالت کې هم د افغان کډوالو د ليسو نوى ښوونيز کال پيل شوى د وږي په ١٥ په گرمو سيمو کې زده کوونکي ښوونځيو ته ځي او د غبرگولي په ١٥ يې ښوونيز کال سرته رسيږي، چې په دې حساب ټولې نهه مياشتې زده کوونکي ښوونځيو ته او درې مياشتې رخصت وي اوس چې نوى ښوونيز کال پيل شوى د افغان کډوالو بچيان او ځوانان د ډېرو ستونزو سره لاس او گريوان دي ځنې د ښوونيزو زده کړو د اسنادو د نه منلو څخه سر ټکوي ځنې د اقتصادي ستونزو له امله نيمه ورځ ښوونځي ته ځي او نيمه ورځ کارکوي چې د زده کړې لپاره فيس برابر کړي يو بله ستونزه، چې د پوهنې وزارت او يا د لوړو زده کړو وزارت ورته مناسبه لار ولټوي هغه دا چې هغه افغان ځوانان چې زده کړه يې د پاکستان په شخصي او يا دولتي ښوونځيو کې کړې او دپاکستان د نصاب له مخې د ١٠ ټولگي څخه فارغ بيا يې اسناد افغان دولت نه مني او ورته ډېرې ستونزې پيښيږي دغه زده کوونکي اړ دي، چې د پيښور په افغان ليسو کې يو ځل بيا درې کاله زده کړه وکړي چې په ١٠ ټولگي کې کيني او له ١٢ څخه ځان په ډېرو ستونزو، په رشوت او واسطو فارغوي ځکه چې د کانکور د ازماينې لپاره د ١٠، ١١ او ١٢ ټولگي نومرې په کاردي او دغه زده کوونکو چې د پاکستان په ښوونځيو کې زده کړې په افغانستان کې د کانکور له ازموينې څخه بې برخې پاتې کيږي نو اړ دى چې په ١٠ ټولگي کې يو ځل بيا په افغان ليسو کې زده کړه ترلاسه کړي له يوې خوا يې پوره درې کاله ضايع کيږي او يا په افغان ليسو کې د ٣ کالو نومرې په رشوت او واسطو جوړوي چې دغه رشوت او واسطه د کابل د پوهنې د وزارت د ارزونې له رياسته پورې رسي
qadirandewal@yahoo.com
Pakhtoonpost@gmail.com
