د لوي او بخښوونكي خداي په نامه
پښتون پوسټ ورځپاڼه
سرليكنه (اداريه )
د پښتونخوا د اطلاعاتو وزير ميا افتخار حسين د پښتونخوا راډيو پرانسته وکړه د دغه راډيو ازمېښتي خپرونې پيل شوي دي او په دوام داره توگه به د کوچني اختر څخه وروسته خپلې خپرونې پيل کړي مياافتخار حسين څرگنده کړې، چې د پښتونخوا راډيو به د امن يو پيغام ثابتيږي او د پښتونخوا د خلکو په بيدارولو کې به ستر رول ولوبوي د پښتونخوا حکومت ته دا وياړ ترلاسه دى، چې د صوبى په نوم يې د راډيو سټيشن پرانسته وکړه، چې د پښتونخوا بچى بچى به پرې فخر کوي د سياسي کتونکو په اند د پښتونخوا په نوم د راډيو سټيشن پرانسته د پاکستان پښتنو او په ځانگړيتوگه ټولو پښتنو ته يو نيک زيرى دى ځکه، چې د پښتونخوا په نوم تر دې دمه جريدى، ورځپاڼى او رسنۍ خپرې شوي دي حتى، چې ويبپاڼې هم د پښتونخوا په نوم شته خو دا، چې يو راډيو هم په دې نامه خپرونې کوي دا په خپله د پښتونخوا تاريخ په گوته کوي په دغه راډيو کې به څه ډول خپرونې خپريږي دا لا څرگنده نه ده خو د پښتونخوا د حکومت لپاره دا يو وياړ دى، چې د پښتونخوا په نوم راډيو پيل کوي که څه هم د پښتونخوا په نوم لا اختلاف شته، چې د پاکستان د مسلم ليگ ن مشر نواز شريف د پښتونخوا د نوم لپاره د ټولپوښتنې غوښتنه وکړه، چې د عوامي نيشنل گوند لخوا په سمدستي توگه رد شوه دا څرگنده ده، چې پښتونخوا ددې سيمې د خلکو پېژندنه ده او د عوامي نيشنل گوند ايالتي حکومت ته ښايي، چې د انتخاباتي مبارزې پر مهال يې، چې کومې ژمنې ولس سره کړي دي په هغه کې يوه د پښتونخوا نوم وه، چې په سرحد به يې ږدي که څه هم ورسره ائتلافي گوند د خلکو گوند منلې، چې د سرحد نوم به پښتونخوا وي،خو ځنې قانوني خنډونو لا په رسمي توگه د دغې نوم ايښودنې ته لار نه ده هواره کړې د پښتونخوا راډيو کې بايد د پښتنو په تاريخ، کولتور او هر اړخيزو دودونو رڼا واچول شي او يواځې د سياسي تگلارې سرچينه نه شي که سياسي تگ لارې هم وي بايد د پښتنو حقوق په کې خوندي شي او ددغې راډيو له لارې د پښتنو د حق غږ پورته شي او د امکان په صورت کې واخستل شي.
qadirandewal@yahoo.com
Pakhtoonpost@gmail.com
