د لوي او بخښوونكي خداي په نامه
پښتون پوسټ ورځپاڼه
سرليكنه (اداريه )
په افغانستان کې د شهيدانو د اوونۍ په نامه د وږي د مياشتې دوه يمه لسيزه نمانځل کيږي دا اوونۍ د هغې ورځې څخه سرچينه اخلي، چې کله له نن څخه اته کاله وړاندې د ٢٠٠١ کال د سپتمبر په نهمه، چې د وږي د مياشتې نونسمې سره سمون خوري د دوه و عربانو لخوا په جبل سراج کې احمد شاه مسعود ووژل شو د کرزي حکومت ددغه اوونۍ د هېواد د خپلواکۍ د شهيدانو په نوم ونوموله، چې يواځې په کې د احمد شاه مسعود د تلين په اړه غونډې سيمينارونه او نور پروگرامونه ترسره کيږي او د هېواد د خپلواکۍ نورو شهيدانو ته چندان پاملرنه نه کيږي دا، چې د هېواد د خپلواکۍ او په ځانگړي توگه د روسانو د يرغل پر ضد ټول افغان مجاهد ولس په يو غږ راپورته شو يو نيم مليون شهيدان يې ورکړل خو د شهيدانو د اوونۍ په ترڅ کې يواځې يو شهيد، چې هغه هم د يو گوند پورې تړاو لري نمانځل کيږي او د نورو شهيدانو پوښتنه نه کيږي حکومت ته په کار دي، چې د شهيدانو اوونۍ په هراړخيزه توگه ونمانځل شي او د هغو شهيدانو نومونه هم ياد شي، چې د روسانو د يرغل پر ضد يې خپل ژوند له لاسه ورکړى که د شهادت کلمې ته وگورو نه الله تعالى به هغوشهيدانو ته خپل اجر او ثواب ورکړى وي، چا چې يواځې د الله د رضا دپاره د هېواد د خپلواکۍ لپاره مبارزه کړي وي او شهادت يې په برخه شوى وي حکومتونه هم دنده لري، چې د هېواد د خپلواکۍ د شهيدانو نومونه د يادگار په توگه ياد کړي څلي پرې جوړکړي او راتلونکي نسل ته يې وروپېژني، چې دغې شهيدانو د خپل هېواد د خپلواکۍ لپاره خپل سرونه نذرانه کړي وه. د خفگان خبره هله وي، چې د هېواد د خپلواکۍ لپاره په ميليونونو شهيدانو قرباني ورکړې خو يادونه نومونه يواځې د يو څو گوندي شهيدانو ياديږي او څلې پرې جوړيږي. او د هېواد د نورو شهيدانو نومونه له پامه غورځول کيږي او کورنيو سره يې لږ تر لږه خواخوږي هم نه ښودل کيږي.
qadirandewal@yahoo.com
Pakhtoonpost@gmail.com
