لومړۍ برخه
کاري مرکې هېڅکله اسانه نه وي؛ خو معمولا څومره چې تاسې ډېر چمتوالی نیسی، په هماغه اندازه ښه پایله ترلاسه کولی شی. د بشري ځواک یوې ډایرکټرې « الکسا چیرټزنګر» په بزنېس انسایډر وېبپاڼه کې په یوه لیکنه کې اووه هغه پوښتنې وړاندیز کړې چې له یوې کاري مرکې وړاندې یې باید د کار پلټونکي په توګه له ځانه وکړئ. هڅه وکړئ چې په کاري مرکه کې تر ګډون وړاندې دې ۷ پوښتنو ته ځواب ورکړی او په دې توګه به د خپلې خوښې وړ دندې د کاري مرکې لپاره تر پخوا ډېر چمتو شئ.
لومړۍ پوښتنه: ولې پر دغه ځانګړي پوست کار کول غواړئ؟
مېرمن الکسا وايي د دې پر ځای چې په سادګۍ ووایی دا کمپنۍ د کار لپاره غوره ځای دی، هڅه وکړی چې مشخص دلایل وړاندې کړی چې تاسې ولې دغه ډول فکر کوئ. د دې پر ځای داسې ووایئ: « دری مشخص دلایل دي چې له مخې یې زه پر دغه پوست کار کول غواړم.»
داسې مه وایی:« اورېدلي مې دي چې دا کمپنۍ د کار لپاره مناسب ځای دی.»
دویمه پوښتنه: د دغه پوست لپاره ستاسې وړتیاوې څومره برابرې دي؟
الکسا لیکي معمولا کار پلټونکي په خپله سي وي کې د خپلو ترسره کړو دندو پر نوملړ بسنه کوي؛ خو د دې په باور سي وي د دې پوښتنې ځواب نه دی. دا وړاندیز کوي چې د کار پلټونکي په توګه داسې څه ووایی چې ستاسې په سي وي کې نه دي ویل شوي او څه ډول ستاسې وړتیاوې له کمپنۍ سره مرسته کولی شي.
داسې ووایئ:« غواړم د هغه ټیم غړی شم چې A او B کارونه یې کړي او فکر کوم چې په X, Y او Z کې زما تجربه به له موږ سره مرسته وکړي چې تر دې هم ښو پایلو ته ورسېږو.»
داسې مه وایئ:« زه په X, Y او Z کې ډېره تجربه لرم او زه فکر کوم چې دا به د یاد پوست لپاره مناسبه وي.»
درېیمه پوښتنه: تاسې د کمپنۍ او هغه پوست په اړه چې غواړی ترلاسه یې کړی کافي معلومات لرئ؟
یوازې دا بسنه نه کوي چې تاسې د کمپنۍ په اړه په ګوګل کې معلومات راټول کړی او فکر وکړی چې کورنۍ دنده مو ترسره شوې او د پوست په اړه مو معلومات ترلاسه کړي دي.
مېرمن الکسا لیکي:« څومره ډېر مو چې له وسه کېږي په هماغه اندازه معلومات راټول کړئ، نه یوازې د کمپنۍ په اړه بلکې د هغه پوست په اړه چې تاسې وړاندیز ورته کوی، د هغه ټیم په اړه چې غواړی غړي یې شی او د استخدام د مدیر په اړه معلومات هم مهم دي.»
داسې ووایئ:« ماته څرګنده شوه چې تاسې د X په برخه کې بګرونډ لرئ، څنګه تاسې خپل ټیم د خپلو اهدافو په اړه خبروئ.»
داسې مه وایی:« د Z په کمپنۍ کې کار کول به څنګه وي؟»
نور بیا...
دغه ليکنه په «هميانۍ» کې هم خپره شوې.
