ولسمشر حامد کرزي ، پرون ( دغويي ١٤مه ) راتلونکيو ټاکنو ته خپل او د دوه مرستيالانو نومونه ثبت کړل .
کرزي ، د لومړي مرستيال په توګه مارشال فهيم او د دوهم مرستيال په توګه يو ځل بيا کريم خليلي غوره کړ .
که څه هم د کرزي خبرو له مودو راهيسې وزن بايللى دى او دا ځکه چې خبرې او عمل توپير لري ، خو دا ځل بياهم خلک ورته په تمه وو.
و ګورئ !
کله چې دلومړي ځل لپاره د خلکو په رايو ولسمشر شو نو ويل يې چې دا ځل به يې حکومت مصلحتي نه وي او يوه مسلکي کابينه به جوړوي .
خو وروسته په دغه مسلکي کابينه کې يې بيا نظامي افسر تورن اسماعيل خان د اوبو او برېښنا وزير کړ .
ولس داسې فکر کاوه چې کرزي به له تېرو ټاکنو ډېر څه زده کړي وي او په دې به پوه شوى وي چې دکريم خليلي معاونيت دده لپاره د هزاره ميشتو سيمو او د احمد ضيا مسعود معاونيت د پنجشير او نورو سيمو په رايو ګټلو کې کوم مثبت اغيز ونه کړ .
بلکې په يادې شويو سيمو کې رايې د محقق او يونس قانوني صندوقونو تويه شوې .
خو دادى يو ځل بيا کرزي يوه هېښنده پرېکړه وکړه .
موږ په هېواد کې ميشتو ټولو قومونو ته په درنه سترګه ګورو او له نورو هم ورته تمه لرو ، خو موږ سره داسې نه کېږي .
وګورئ !
په يوه ملک کې د ولسمشر مرستيال د دوهم ولسمشر په ماناوي ، يانې د ټول ملت د حقونو د خونديتوب مسووليت لري .
خو کله چې کريم خليلي تېره اونۍ په کابل ښار کې په يوه غونډه کې چې شاوخوا ٣٠٠٠ شيعه او هزاره وروڼو په کې ګډون کړى و ، خپلې لاسته راوړنې بيانولې نو غټ ټکي يې داوو چې څو کاله مخکې شيعه او هزاره چا نه پېژندل او اوس يې ټوله نړۍ پېژني او...
مطلب داچې هغه د خپل قوم او مذهب پلوي کوله او ځان يې همدوى پورې نښتى باله نه ټول افغان ولس پورې .
همدارنګه مارشال صاحب فهيم پسې هم تراوسه د يوه ولايت او ډلې نوم ټينګ نښتى دى او کله خو حتى له نورو سره حساسيت هم ښيي .
و ګورئ ، دوه کاله وړاندې ، د وږي په ١٨مه ، د کابل په غازي لوبغالي کې د شهيد اونۍ لمانځل کېده
حامدکرزي لا خپلې خبرې پوره کړې نه وې چې يو شور جوړ شو ، د احمد شاه مسعود او امان الله خان عکسونه په ډبرو وويشتل شول .
مارشال فهيم پرته له دې چې ځان په خبره پوه کړي يو خبريال ته يې وويل چې د کونړ او جلال اباد خلکو ډبرې وويشتې او ګډوډي يې جوړه کړه .
خو وروسته معلومه شوه ، چې داکسان هم چې تعداد يې شاوخوا٤٠٠ ته رسېده د کونړ او جلال آباد نه بلکې د مارشال صاحب د سيمو وو .
دغو کسانو غوښتل په زوره غونډې ته ننوځي او چې امنيتي ځواکونه يې مانع شول نو زړه يې په غازي امان الله خان تش کړ ، د هغه عکس يې وويشت او بيا کومه ډبره د مسعود په عکس هم ولګېده .
موږ دا حق نه لرو چې ولسمشر کرزي نه د مرستيالانو د غوره کولو واک واخلو ، دا واک اساسي قانون ورکړى دى .
خو دومره حق لرو چې ورته ووايو چې داسې مرستيالان يې بايد ټاکلي وى چې د ټول ولس استازيتوب يى کولاى شوى .
په هرصورت ، کېداى شي د رعيت ډېر زغم کرزى صاحب غره او د زغم کونکيو پروړاندې بې تفاوته کړي وي .
که په ياد مو وي ، کله چې بهرنيو ځواکونو د ننګرهار په شينوارو ولسوالۍ کې دواده مراسم بمبار کړل او نږدې ٥٠ کسان يې شهيدان کړل نو ولسمشر کرزى يې دعا ته ولاړ .
هلته پر ځاى ددې چې خلک ورته ووايي چې ته زموږ واکمن يې ، زموږ د ساتنې مسووليت لرې او بايد ددې وژل شويو کسانو ځواب ووايي نو يوه تن وويل چې زموږ ټولو شينوارو رايې ستا شوې .
دادى له يادو شويو ستونزو سره – سره ، کېداى شي بيا هم ټولې رايې دده شي .
موږ هميشه خپلو مشرانو ته په درنه سترګه ګورو خو افسوس چې د هغوى چلند معکوس وي .
په ولس سوداګري کوي او دغه لنډۍ سړي ته ور په زړه کوي چې :
عالمه مينه ، مينه نشته سوداګري ده يو په بل يې خرڅوينه
يادښت :
تبصرې ازادې دي ، خو دکلام عفت شرط دى .
