که خواران د پښتو شته دی پښتنو کې غني هم شته
په دې ورانو کنډوالو کې فلسفی ليوني هم شته
تاته څه ښکاره رقيبه دغه سپينې سپينې خولې
د دې سپينو تيږو شاته قهريدلي زمري هم شته
د خوشال له اکوړي نه د حمزه خیبر ته ګوره
هر قدم په دغو غرو کې ستر احمد او غوري هم شته
د بابړې شهيدانو صمد خان او ايمل یو کړۍ
د دې لوی ارمان خاوند مو صنوبر کاکاجي هم شته
زه له خپلو نه جدا شوم د پردو په خپلولو
د بيلتون په لاره درومي خپلو منځ کې پردي هم شته
له زلمو که پوره نه شو پښتنو پيغلو راپاڅۍ
دا ويده ويده راويښ کړۍ په ويدو کې سړي هم شته
د دې تورو غرونو کاڼي تور سکاره دي د ډبرو
پام چې کم نظر ونه کړۍ پکې سره سره غمي هم شته
که ګورګين په شان د سپيو غلچکۍ حملې شروع کړي
لويه غيږه د نازو کې ميرويس رنګه بچي هم شته
تور تمونه او جنګونه که تپلي په مونږ نورو
د سبا د اميدونو ملا تړلي زلمي هم شته
دا نوم رکي شهيدان چې مو د لمر په لوري خاندي
دې خندا کې ستر رازونه د جمال د پټکي هم شته
د پامير خيبر له سره تر سستان بلوچستانه
ارمانونه ژوندۍ هيلې د تره کي کوچي هم شته
د نفاق تورې تيرې دي بښتانه يې سره بيل کړل
خدمتګاره! دې ولس کې دغه بده کمي هم شته
