ننۍ غونډه دافغانستان د ليکوالو دبېلابېلو ټولنو ،مدني اتحاديو اوروښنفکره افغانانو داستازو په بلنه دافغانستان سترملي اتل او دخپلواکۍ ګټونکی غازي امان الله خان په درناوي جوړ ده . ددې غونډې هدف دادی ،چې په دې وروستیو وختونو کې د يوشمېر پرديپالو اشخاصو اوکړيو له خوا زموږ دملي ارزښتونو او ملي اتلانو د پيکه کولو او توهينولو هڅې پيل شوي دي ، سره له دې چې کوم څاڅکی او يا څو څاڅکی درياب نه شي ناولی کولای اونه دا ډول خلک زموږ دولس دارادو پر وړاندې ودريدی شي ،خو څرنګه ، چې زموږ ولس د ننګ ، ناموس ، هېواد ساتنې ، اسلامي او ملي ارزښتونو لپاره سترې قربانۍ ورکړي او د قربانيو دا لړۍ نوره هم دوام لري ، نو ځکه خودملي خاينينو پر وړاندې ډېر حساس دي او هېڅکله هم د ملت د خدمتګارانو توهين او تحقير نه زغملای . دا غونډه هم دملي خاينينو پر وړاندې يو چټک غبرګون دی .
غونډه دکابل پر مهال 3.00بجې دقاري حبيب الرحمن له خوا دقران کريم د څو اياتونو په تلاوت پيل شوه ورپسې د هېواد ملي سرود وغږول شو دويندوې چارې د ډاکتر اکبري پر غاړه وې .
له ملي سرود وروسته د کابل په انصاف هوټل کې جوړې شوې غونډې ته دغو ښاغلو وينا وکړه :
په کابل کې د اوسيدونکو ځدرانو دشور ا رئيس مير زمان خان وفادار .
دننګرهار د ولايتي شورا رئيس فضل الهادي مسلم يار .
دکابل دولايتي شورا مرستيال ډاکتر عاشق الله
دميرمن ټولنيز کلتوري بهير مشره او دخوست دخلکو استازۍ ميرمن ساهر ه شريف .
په اروپا کې دافغاني کلتوري ټولنو دګډې جرګې استازي الحاج محمد امين باوري ددغې جرګې پيغام ولوست .
عطاء الله ويسا خپل يو شعر ولوست .
د افغانستان دقومونو دتفاهم نهضت ريس او عليحضرت غازي امان الله خان وراره سردار عبدالعلي سراج .
دتخار ولايت دمفاهمې اوانسجام ټولنيزې شورا په استازيتوب ډاکتر محب الله کټوازی .
دکابل پوهنتون دمحصلينوپه استازيتوب غورځنګ سیال .
دکندهار دخلکو په استازيتوب احمد شاه پوپلزی .
دشمال د عنعنوي اواصلاحي جرګې په استازيتوب عمر صافی .
غوث الدين فروتن( د افغانستان دملي ارزښتونو اوشخصيتونو د پالنې او ساتنې ټولنه ) دجوړونې اعلان وکړ .
په غونډه کې نږدې 400 کسانو ونډه اخېستې وه پردې سربېره دولسي جرګې ، د اطلاعاتو کلتور وزارت ، دکابل د تعليم او تربيې پوهنتون ، کابل پوهنتون ،دمېرمن ټولنيز کلتوري بهير غړو او يو شمېر مخورو ونډه اخېستې وه .
دغونډې وروستې ويناوال په ولسي جرګه کې د کندز دخلکواستازی ښاغلی معين مرستيال و نوموړې وويل : چې نن مې له ډېرې هڅې وروسته وتوانيدم ، چې د 40 تنو وکيلانو په راضي کولو سره د لطيف پدرام خبره دولسي جرګې په کاري اجنډاکې شامله کړم اودبحث لپاره د دوشنبې ورځې غونډې ته وځنډيډه . غونډه دمعين مرستيال په دعاء پای ته ورسيده .
په تالار کې يو شمېر شعارونه په دې ډول و :
د افغانستان دولت بايد ژر تر ژره دملي اتل غازي امان الله خان توهينونکی لطيف پدرام ، محاکمې ته راکاږي .
څوک ، چې خپله سپک وي ، نور سپکوي ، څوک چې دروند وي نور درنوي .
موږ دخپلو ملي شخصيتونو درناوی غواړو ، نه سپکاوی .
دغونډې په پای کې دغه مطبوعاتي اعلاميه صادره شوه
- د هېواد دملي اتلانو له هغه جملې څخه د ستر ملي اتل غازي امان الله خان د توهينونکی لطيف پدرام ، ګستاخي ، توهين او بې ادبي په کلکه غندو .
- له حکومت او په مجموعي ډول له ټول دولت څخه په کلکه غواړو ،چې لطيف پدرام ژر تر ژر ه د قانون منګولو ته وسپاري او محاکمه يې کړي .
- له دولت څخه غواړو ،چې دخپلو پريکنده ګامونو له لارې دنورو دا ډول توهينوونکو هڅو مخه ونیسي .
- له رسنيو او مدني ټولنو څخه غواړو ،چې د دا ډول دتوهینوونکو عناصرو پر وړاندې خپل غبرګون وښيي او مناسب ځواب ورکړي .
- که چیرې دولت دې ډول عناصرو ته قانوني سزا نه شي ورکولای ، نو د ټول ملت او هېوادساتنې ادعا دې هم پريږدي ، موږ له خپل غيرتي ولس څخه غواړو لکه څنګه چې یې پرديو يرغلګرو ته غاښ ماتونکی ځواب ورکړی ، دهغوی غلامانو او تالي څټو ته هم ورته ځواب ورکړي .
- که دولت بیاهم ددې ډول توهين پر وړاندې غلی پاتې شي ، نود ټولو راپيداکېدونکو بدو عواقبو مسووليت به د دولت پر غاړه وي .
