محترمو ورونو! السلام علیکم و رحمت الله وبركاته ، همدا اوس دپنجشنبې ورځ د ماښام په اوو بجو او پنځوس دقیقو په عربستان سعودې کې دقضاء داوچت مجلس دائمي هیئت- اعلان وکړ، چې سبا دجمعې ورځ دکوچنې اختر ورځ ده، چې دشوال دمیاشتې دلومړۍ نیټې سره سمون خوري . ټولو مسلمانانو، او افغانانو ورونو ته دې اختر مبارک وي. تقبل الله منا ومنکم صالح الأعمال. دغه دعا به صحابه کرامو یو بل ته کوله، او په دې به يې اختر مباركي سره کوله، کله چې به اختر کې یو له بل سره مخ شو. الله جل جلاله دې زموږ له هیواد څخه دغه دکړاوونو، غمونو، او مصیبتونو ټغر نور غونډ کړي، او دتل لپاره دې پرې دخوښیو بارانونه وکړي. الله جل جلاله دې زموږ دوطن او د دین دښمنان نیست او نابود کړي، او یوځل بیا دې دهمیش لپاره زموږ په وطن کې دسولې، امنیت، خوښۍ، سلام، او خوشحالتیاوو فضا را منځته کړي. وهاج ساپی مدینه منوره، سعودي عربستان
