ځان هڅونه

ځان هڅونه هغه انګېزه او محرک دی چې کار، عمل او بریالیتوب ته دې لارښوونه کوي. ځان هڅونه مانا د کار او سمون لپاره د ځان پارونه او لمسون. څنګه کولای شې خپل ځان وهڅوې؟ که غواړې چې د ځان هڅونې په اړه لارښوونې تر لاسه کړې نو لاندې څو کرښې ولوله.
ځان هڅونه هغه الهام دی چې ستا د کړو وړو تر شا شتون لري، دا یوه هغه ډېره مهمه کړنلاره او میکانیزم دی چې له بهرني اغیز پرته له تا سره موخې ته د رسېدو په لار کې مرسته کوي. ځان هڅونه ستا باور رغوي، عزت النفس دربښي او د موخو په لاسته راوړولو کې دې ځواکمنوي.

 
څنګه کولای شې خپل ځان وهڅوې؟
ستا د ژوند په هر اړخ کې ځان هڅونه ډېره مهمه ده، په مسلکي اړخ، ټولنیز ژوند، اړیکو، روغتیا، د شخصیت په وده او آن په روحاني اړخ کې له ځان هڅونې پرته وړ پرمختګ نه کېږي. لومړی باید په دې پوه شې چې تا څه شی ښه هڅوي، ځینې خلک د مخورو او اغېزناکو خلکو له امله هڅول کېږي حال دا چې ځینې نور بیا د پاروونکو کتابونو، کیسو او شعرونو له امله هڅول کېږي. په دې برخه کې بېلابېل خلک له ډول ډول لارو چارو څخه کار اخلي خو ځان هڅونه تر ټولو ډېره اغېزناکه لاره ده. شونې ده د یوه پاروونکي کتاب لوستل تا د لنډ مهال لپاره وهڅوي خو که کولای شې خپل ځان په خپله وهڅوې نو د دې اړتیا به نه پېښېږي، چې په خارجي عامل متکي واوسې. ځان هڅونه تر ټولو غوره پارونکی او لمسوونکی تخنیک دی.
د ځان هڅونې په اړه دا لاندې څو داسې لارښوونې دي، چې هم یې یادول او هم یې تعقیبول اسانه دي:

 
خوب او خیال: له خوب او خیال پرته نه شې کولای چې څه لاسته راوړې، ته باید په دې پوه شې چې لوی سړي د خپلو خوبونو او خیالونو د رښتیا کولو په لار کې څومره هلې ځلې کوي او څومره ور ته ځوریږي. هر څوک د مارتن لوتر کینګ له هغې وینا سره اشنا دي چې په کې یې ویلي وه: زه یو خوب او خیال لرم. که چېرې ته یو خوب او خیال ولرې نو د هغه د رښتیا کولو لپاره به مصمم اوسې او هغه لارې چارې به تعقیبوې، چې تا سره ستا د خوب په رښتیا کولو کې مرسته کوي.
رښتوني او کره پلاونونه جوړ کړه: دا ډېره مهمه خبره ده، چې د ځان لپاره رښتونې او عملي موخې وټاکې، دغه موخې باید غیر عادي یا داسې نه وي چې تر لاسه کول یې بېخي نا شونې وي. تر ټولو لومړی باید خپلې غښتلتیاوې، وړتیاوې، محدودیتونه او نیګړتیاوې په ګوته کړې او بیا یې پر بنسټ خپلې موخې وټاکې. د دې تر څنګ باید خپل ډیزاین شوی پلان په چاپي بڼه ولرې او ستا عملي پلان باید لچک لرونکی او بدلېدونکی وي تر څو دوام وکړي او داسې نه شي چې په نیمه لار کې له ناکامۍ سره مخامخ شي.
مثبت سلوک: ستا رویه او سلوک تر ټولو ستره شتمني ده. پر دې سربېره مثبت سوچ ډېر مهم دی ځکه چې ستا مثبت سوچ او رویه ستا پلانونه او کارونه تر اغېز لاندې راوستی شي. مه پرېږده چې منفي سوچونه او خلک پر تا اغېز وکړي. خپلو موخو ته د رسېدو په لار کې مه نهیلی کېږه او مه زړه وهه. خپل مثبت اړخونه او بریاوې له ځان سره ولیکه ځکه، چې دا کار ستا په خپل ځان باور غښتلی کوي.
یو وړوکی قدم واخله خو پیل وکړه: دا ډېرو هڅو ته اړتیا لري، چې په کاري پلان پیل وکړې. ډېر ځله داسې کېږي، چې ډېرو خلکو خپل پلانونه چمتو کړي وي خو دا ور ته خورا ګرانه ښکاري، چې پیل وکړي. لږ تر لږه ته باید یو قدم پورته کړې، چې خپل کار پیل کړې. یو ځل چې پیل وکړې دا بیا اسانه ده، چې دوام ور کړې. له دې نه مه ډارېږه، چې تېروتنې به در نه وشي ځکه، څومره چې ویره لرې په هماغې اندازه د دې شونتیا رامنځته کېږي، چې ته به د یوې بلې تېروتنې مرتکب کېږې. په یاد لره چې هرې ناکامۍ پسې کامیابي وي.

 
د بهرني نفوذ مخنیوی وکړه: د زیانمن باندني نفوذ لکه منفي سوچونو او خیالونو په بشپړه توګه مخه ډب کړه. ته باید په هېڅ ډول شرایطو کې خپل ذهني انډول له لاسه ور نه کړې او نه باید هیجاني، زړه ماتی او خواشینی شې. خپلو احساساتو او جذباتو ته اجازه مه ور کوه چې ستا پر کارونو لاسبري شي.

 
ټینګوالی/ثابتوالی: ثبات او منظموالی ستا په کارونو کې ډېر مهم دی، دا شونتیا لري چې د پیل د لمسون او هیجان تر بشپړېدا وروسته ستا زړه مات شي او یا هم ستړی شې خو ته باید خپل ځان پخپله وهڅوې او ټول ترکیز پر خپل ځان وساتې. خپلې غوښتنې پخپله غښتلې کړه، چې بریالی شې. د سرچینو له کمښت او نا مناسبو حالاتو نه سر مه ټکوه. که چېرې تا په رښتیا پرېکړه کړي وي نو باید خپلې موخې ته ځان ور سوې او هېڅ ډول خنډ ته اجازه ور نه کړې، چې تا او یا هم ستا کاري پلان تر اغېز لاندې راولي. په یاد لره چې ژمنتیا تر ټولو مهم شی دی.
 
ځنډ ستا دښمن دی: له یوې ورځې بلې هغې ته خپل کار ځنډول به د موخې په لاسته راوړلو کې ستا مزل اوږد کړي. له لټۍ او تنبلۍ نه ډډه وکړه. د ځان د بیا تازه کولو او د نور قوت د اخیستلو لپاره وقفه کول یو منلی شی دی خو د نن ورځې کار باید سبا ته ونه ځنډول شي. د پرمختګ په لار کې ځنډ تر ټولو ستر خنډ دی.

 
پیل شوی کار مه پرېږده: که چېرې ته سم پلان او کړنلاره تعقیب کړې نو د بریالیتوب په اړه ډاډه اوسه. خو کله کله داسې هم کېږي، چې کارونه سم پر مخ نه ځي او ته باید په داسې حال کې هم نهیلی نه شې. خپلې هڅې روانې او جاري ساته، کوښښ کوه، چې خپلې تېروتنې پیدا کړې او ځان پرې پوه کړې خو کار به نه پرېږدې. په دې اړه دغه مشهوره وینا په یاد لره: (بایلونکي هغه مهال کار پرېږدي چې کله ستړي شي او اتلان هغه مهال کار پرېږدي چې کله مډال تر لاسه کړي).
چې خبره داسې ده نو په کلک عزم سره پیل وکړه او که یوه کوچنۍ لاسته راوړنه دې هم لرله نو ځان نازوه او ځان ته شیریني او انعام ورکوه. په خپل ځان باور پیدا کړه، که دا کار دې وکړ نو په اسانۍ سره کولای شې، چې خپل ځان پخپله وهڅوې. د ځان هڅونې دغه لارښوونې هره ورځ او یا هم په اونۍ کې یو ځل له مخې تېروه او ډاډه اوسه چې بریالی به یې.

 
د ځان هڅونې په اړه څو ویناوې:

• وګړي هغه مهال بریالي جوتېدای شي، چې د ځان په اړه داسې سوچ وکړي، چې دوی هم څه کولای شي، کله چې دوی په خپل ځان باور پیدا کړي داسې وګڼه، چې دوی د بریاليتوب لومړی راز وموند. Norman Vincent Peale
  
• که چېرې د دې زړورتیا لرې، چې په یو څه پیل وکړې نو د دې زړورتیا هم لرې، چې بریالی هم شې. David Viscott
  
• راځئ، چې خپل ړومبني تشویشونه په پرمختللیو فکرونو او پلانونو واړوو. Winston Churchill
  
• لومړی ګام په باور سره پورته کړه، بیا د دې اړتیا نشته چې پخپلو ټولو ګامونو پسې وګورې، فقط لومړی ګام پورته کړه. Martin Luther King
  
• هر هغه څوک چې ستا په اړه شک کوي او بدګمانه وي او درته وايي چې ته ناکام یې، دوه ځله سخت کوښښ وکړه، چې دوی غلط او ناسم جوت کړې.
  
• د دې خبرې پرله پسې وېره، چې ته به ګنې د یوې تېروتنې مرتکب شې ستا تر ټولو ستره تېروتنه ده.