زموږ په سيمه کې متل دی چې یو په خدای او بل په خبرو کې هر څوک حق لري دا دوه ورځې د خوست هغه شهدان مې سترګو ته کيږي چې دفساد پر صد د خوست واټونو ته روتلی وو او یو ځانمرګي یې وجودونه رنجې رنجې کړل.
درې ورځې په خوست کې ماتم اعلان و، د ټولو شهدانو په یاد ښار په واټونو او سړکونو کې خلکو شمعې بلولې په ټول ښار کې تور بیرغونه او تورې جنډې ځړیدلې وې.
ټولو فیس بوکیانو په پورفایلونو په وینو سره تصویرونه لګولي وو خو دې ارګ په رسمي پاڼه مو نه د غمشریکۍ پیعام ولید او نه د ارګ ټولواک وویل چې په خوست کې څاروی مړه دي که انسانان؟!
زموږ ولس له فساد نه نور تر پوزې راغلی دی، دخوست په هره اداره کې د فساد عناصرو خولې نیولې دي هر چارواکي که ريیس د يوې ادارې دی او که مامور د يوې ادارې د پوښتنې سړی يې ورک دی چور او چپاول يې پيل کړی دی.
په ښکاره وایي چې هسې نه هم زه سرپرست یم سبا او بله ورځ به په دې چوکۍ نه وم باید خپل جېب ډک کړم.
هیڅوک د دې وطن او د دې ادارې په غم کې نه دي ولې اوس خلک د دې فساد پرخلاف لاریونونه نه کوي؟
ولې اوس خلک لاریون ته زړه نه ښه کوي ؟ ولې دځمکو د مافیايي ګروپ مخه نه نيسي؟
دا هغه پوښتنې دي چې باید د ارګ ټولواک ورته ځواب پیدا کړي که زموږ د هغه شهيدانانو سمه پوښتنه شوې وی او عاملين یې د قانون منګولو ته سپارلی شوي وی نن به هر چا د فساد پرخلاف مبارزې ته ملاتړلې وی هر څوک به د ځمکو د مافیايي پر خلاف را پورته شوي وی.
دوی به لکه غرونه د مفسدينو د هر مرذار ګزار لپاره ډال ګرځيدلي وو؛خو دې ملی وحدت چې زه ورته ملي شرکت وايم او د دې شرکت مشر د خلکو زړونه داسې مات کړل ،چې په بېرته جوړولو به یې ډیر وخت ولګيږي.
زموږ سره د ولس مشر کرزي د حکمرانۍ نه تر اوسني ملي شرکته پورې د مور او میرې چلند شوی دی.
د ظاهرشاه په واکمنۍ کې به چې زموږ دې خوست مشران ارګ ته راغلل په دروازه کې به د تشریفاتو ګروپ د دې لپاره ورته ولاړ و چې غږ پرې وکړي چې شمبلورو شه راغلاست.
بس په همدې شه راغلاست زموږ مشر خوشال وو نه د وزارت په کیسه کې وو او نه يې د کوم ولایت مشري غوښتله مشران ښه پکې خوشال وو خو خوار ولس ته چا د تور توت غوندې ارزښت هم نه ور کاوه
زموږ مشران به همدې ته خوشال وو چې شاهي کورنۍ ځان زموږ پوره وړې بولي او زموږ په دا ناره چې ( شملورو شه راغلاست) دومره دروند استقبال کوي.
د کرزی په وخت کې کټ مټ هغه د طاهرشاه وخت کانې راسره کیدې یوه وړوه بېلګه یې دلته درته راوړم.
یو ځل زموږ ځیني مشران د کرزی لیدو ته راغلي وو مشرانو ورته ویلی وو چې زموږ خلکو ته باید په کابینه کې ځای ورکړل شي پوهیږئ چې کرزی څه ورته ویلی وو ؟ یه تاسو په وزارتو څه کوئ زه ستاسو یم کنه.
هر وخت خکومتونو پاچاهانو وزیرانو او والیانو په تشو وعدو غلط کړي یو او د مور او میرې چلند يې را سره کړی دی.
موږ په پټو سترګو باور پرې کړی دی همدا اوسنی حکومت هم هغه د ظاهرشاه د وخت مثال دی.
دوی به ویل چې زموږ ولس نه په سیاست پوهیږی نه په حکومت داری او نه د حق په غوښتلو خو داسې نه ده.
شکر اوس د لويې پکتيا ولسونه ویښ دي.
سره له دې چې په ټول ټاکنو کې موږ خوستوالو له هرچا نه زیاته قربانی ورکړه اشرف غني ته مو په یوه خوله رایه ورکړه خو نن هغه ولسونه چې په سختو شپو او ورځو کې يې ورته نه ستړی کیدونکي منډې ترړې وکړې له پامه غورځولې دي.
اې!! دخوست ولسه څنګه چې پرون په یوه خوله ټاکنو ته را وتلي وې نن هماغسې سړکونو او بازارونو ته را ووځه او د خپل حق غوښنه وکړئ د انسانيت ستر سفير فخر افغان باچا خان بابا خبره چې حق څوک چاته نه ورکول کيږي بلکې حق اخیستل کیږی.
دولت هم سل فيصیده په موږ نه دی ملامت چې کوم قوم د خپل حق غوښتنه نشي کولی چې یو څوک فسادګر په کلکو ټکو هم نشي غندلی چې څوک کلک هوډ نلري دولت خو هغو ته کور ته چوکی یا مقام نشي ور وړلی.
د حق عوښتل په دې مانا نه دي چې موږ د دې ولسمشر سره په محالفت کې و لاړ يو او یا خدای نا خواسته په ښارونو کې ورنکاري وکړو باید مدني حرکتونه وکړو که له هغې لارې مو خپل حق لاس ته را نه وړ نو بیا هغه وخت به په يوه خوله ټول خپل غږ پورته کړو ګنې بیړی مو ډوبيږي.
ابراهيم ايمان ـ خوست
