وړمه ورځ سه شنبه د روان زېږديز کال د جولای ۲۹ مه، چې د کمکي اختر له دوهمې ورځې سره سمون درلود په روسيه کې د مېشتو افغانانو سرتاسري اتحاديې د تل په شان کوچنی اختر د شانداره اختريزې غونډې په ترڅ کې ونمانځه .
دغې غونډې ته په روسيه کې د مېشتو افغانانو د ګڼ شمېر مشرانو، فرهنګيانو او مخورو سپين ږيرو او ځوانانو په ګډون بهرني مېلمانه هم را بلل شوي ول.
غونډه د قاري عاشق الله غني زاده له خوا د قرآن عظيم الشان په تلاوت پيل شوه. ورپسې په روسيه کې د مېشتو افغانانو د سرتاسري اتحاديې مشر انجينير عزيزالله انيس دريځ ته را وبلل شو. نوموړي مېلمنو ته هرکلي او د کمکي اختر مبارکي وويله.
عزيزالله انيس د روژې پر فضيلتونو، فردي او اجتماعي اړخونو خبرې وکړې او د اختر لمانځل يې زموږ د ديني او ملې راټولېدو لپاره ستر ارزښت وباله، له راغلو هېوادوالو څخه يې مننه وکړه، چې د پرديسۍ له ستونزو سره سره د خپلو ملي او ديني ارزښتونو پالنه کوي او خپل افغانيت او اسلاميت ژوندی ساتي.
ښاغلي انيس په هېواد کې په ورستيو ناخوالو هم اندېښنه څرګنده کړه او د ارګون، پکتيکا، غور او په کندهار کې د قومي مشر حشمت خليل کرزي د شهادت په پېښو يې خپل ژور خپګان وښود.
نوموړي د الله (ج) له دربار څخه د شهيدانو ارواوو ته د بښنې دعا او کورنيو، دوستانو او خپلوانو ته يې د زغم غوښتنه وکړه.
هغه د غه راز د هېواد په روانو حالاتو خبرې وکړې او په هېواد کې د نا امنۍ، فساد، بېوزلۍ او فقر څخه د وتلو په موخه يې له افغان دولت څخه وغوښتل تر څو په سوله ييز او شفاف ډول د ټاکنو پايلې اعلان او زياته يې کړه چې راتلونکی حکومت دې پورتنيو ستونزو ته د خپل کاري پلان په لومړيتوبونو کې ځای ورکړي.
له هغه وروسته د روسيې د انتر ناسيونالست پوځيانو د انجمن مشر رېزانڅوف يوري ايوانوويچ په خپل وار د تالار ناستو مېلمنو ته خپل سلامونه او د اختر مبارکي وړاندې کړله.
ښاغلي ريزانڅوف له افغاني کلتور سره پوره اشنايي لرله او افغانان يې درانه او هېواد پال ياد کړل. نوموړي په افغانستان کې د اوسېدو د وخت خپلې خاطرې له ګډونوالو سره شرېکې کړي او د افغانانو مېلمه پالنه او د اخترونو جشنونه يې وستايل.
د پرګرام بله برخه کنسرت او اختريز شعرونو ته ځانګړې شوې وه چې په روسيه کې د مشهور سندرغاړي نور نصيب سندرو او د ځوانو شاعرانو اختريز شعرونو پرګرام لا ګلورين کړ. د ګډونوالو نڅاګانو، اتڼونو او مستو چکچکو کنسرت تر پايه ژوندی ساتلی و.
د غونډې د اختريزو شعرونو په برخه کې د ځوانو شاعرانو احمد شکېب څمکني او امان الله شکيب بيتونو او شعرونو غونډې ته لا رنګ ورکړ او د غونډې د ګډوالو له لورې د يوځل بيا يوځل بيا ويلو په نارو سره ځوانان تشويق او پرګرام تر وروستيو شېبو مست روان و.
د غونډې د وياندۍ چارې د اسدالله نوري لخوا ترسره شوې.
دغه اختريز پرګرام د مازيګر په ۶ شپږو بجو پيل او د ماخوستن تر ۱۱ يو لسو بجو دوام درلود، چې د ماښامنۍ په خوړلو سره پای ته ورسېد.
