دوه شپې سر په سر ډېرې هېوادونه زلزلو ولړزول . د پلازمينې کابل په ګډون زموږ هېواد يې هم و جړقوه او خلک يې نيمه شپه راويښ کړل .
دا ځل زلزلې د شپې لخوا په داسې حال کې ځمکې ته ټکانونه ورکوي چې پر غزه د خونکارو اسراييلو له خوا ناتار جوړ دى .
الوتکې له سکروټو ډکې سينې پر غزه خالي کوي ، راکټونه کورونه ړنګوي ، د جسدونو انبارونه جوړ دي ، ځمکه په وينو لړل شوې ، د ټپيانو زګيروي دي ، د ماشومانو خولې له خاورو ډکې دي او ...
خو اسلامي نړۍ په درانه خوب ويده ده ، زموږ د هېواد په ګډون يو نيم ځاى کې يواځې مظاهرې کېږي او د زنده باد مرده باد شعارونه پورته کېږي .
خو دغو شعارونو تر اوسه د اسرايلو له لاسه ټوپک نه دى غورځولى ، د هغوى الوتکې يې نه دي نسکورې کړي او فلسطينيان يې په دې شپږو لسيزو کې له ظلمونو ، نه دي ژغورلي .
مظاهرې او شعارونه يو بې خونده تکرار دى ، په طبعيت هم دغه بې خونده تکرار بد لګېږي نور يې د اورېدو حوصله نه لري ، نور نشي زغملى چې د راکټ ځواب په شعار واوري .
طبعيت پوهېږي چې مسلمه امت په درانه خوب ويده دى او يا بېهوښه کړى شوى دى او کومه چيغه چې وهي هغه هم خوب کې وهي .
دغه امت اوس يوه درانه ټکان ته اړتيا لري ، تر څو اصل ته متوجه او داساسي چارې په لټه کې شي ، همدا لامل دى چې دو شپې پرله پسې زلزلې دي .
طبعيت پوهېږي چې :
ترڅو دغه امت راويښ نه شي ، خپل ټوټه – ټوټه بدن يوځاى نه کړي ،
ترڅو دغه امت د خپلو مټو له پرېکولو لاس وانه خلي ،
ترڅو دغه امت د علم او تخنيک په ګاڼه سمبال نه شي .
ترڅو دغه امت په خپلو پښو ونه درېږي .
او ترڅو ...
هر ځاى به غزه وي او هرځاى به پر مسلمانانو ناتار جوړ وي .
کابل
