د جلالکوټ ادبي خوځښت د ٢٥مې اونيزې غونډې رپوټ!

جلال الدين غريبدوست
د ١٣٨٩ لمريزکال د وري پرنولسمه د جمعې پرسهار جلالکوټ ادبي خوځښت خپله پرله پسې پينځه وېشتمه غونډه په جلال ابادښارکې د بي بي حوالېسې شاته د مېديوتيک په انګړ کې وکړه.
د غونډې مشر صيام الدين پسرلى،مشرمېلمه محمود خزان او کوربه اميرحمزه بهارشينوارى و.
ويندويي يې الله محمد حسن زي کوله.
غونډه د اميرحمزه لخوا د قرآنکريم د څو سپېڅلو اياتونو په تلاوت سره پيل شوه.
جلال الدين غريبدوست د تېرې اونۍ رپوټ ولوست،بياله ژمنې سره سم فرهادالله حسېب خپل غرل کره کتنې ته وړاندې کړ،چې مطلع يې وه:
له کوره راوتلې ده سرتوره لېونۍ
په زوررانه زړه غواړي ده سرزوره لېونۍ
جانان زمري وويل:که دويمه نېم بيته داسې شي ښه به وي:
په زوره رانه زړه غواړي سرزوره  لېونۍ
محمود خزان بياوويل:سرزوره د مذکرلپاره استعمالېږي،که دويمه نېم بيته داسې شي،ښه به شي:
سرزورى رانه زړه غواړي په زوره لېونۍ
د خزان په نظر دې سره به هم دا مذکر مونث شي او بل به رواني هم پيداکړي.
دويم بيت و:
په مينه به دې مړشم خو جدا به له تانه شم
وفابه درسره کوم ترګوره لېونۍ
بيادوياند لخوا درېيم بيت ولوستل شو:
يوخوب مې دى ليدلى که رېښتياشي،ډېربه ښه وي
په سره جوړه کې راشې له خپل کوره لېونۍ
دابيت په چکچکو د ټولو لخوا بدرګه شو.
څلورم بيت و:
غريبه ده زماغوندې سحرماښام يې وينم
وي لاس کې يې نيولې ډوډۍ سپوره لېونۍ
دابيت هم وستايل شو.
مقطع وه:
حسيبه!دعاګانې ورته کړه چې تانده اوسي
خداى مه کړه چې ولوېږي له شوره لېونۍ
محمود خزان وويل:که دويمه مسره داسې شي ښه ده:
خداى مه کړه چې راولوېږي له شوره لېونۍ
خوسمندرساحل بياوويل:که داسې شي،سکتګي  به پکې پيداشي.
اميرحمزه وويل:که داسې شي،ښه ده:
الله مه کړه چې ولوېږي له شوره لېونۍ
د ده نظر ټولو تاييد کړ.
پرغزل ترخبرو وروسته فرهاد الله حسېب د غزل شاعر ته بلنه ورکړل شوه،ده له ټولو مننه وکړه.
بياازاده مشاعره وشوه چې:جانان زمري،سميع الله تندر،فريدملاتړ،افکارمجرب،توفيق الله رهي،محمد نواب خوښ،غرفان الله،جلال الدين غريبدوست،فرهاد الله حسېب،سعدالله فطرت،سمندرساحل،اميرحمزه بهارشينواري،محمود خزان او صيام الدين پسرلي پکې خپل شعرونه واورول.
ترمشاعرې وروسته صيام الدين پسرلى د غونډې ارزونې ته وبلل شو.
پسرلي وويل:داغونډه د نورو غونډو په پرتله ځکه ښه نه وه چې ملګري پکې کم وو.
د غونډې په وروستۍ برخه کې پريکړه وشوه چې راتلونکې اونۍ ته به سمندرساحل خپل غزل کره کتنې ته وړاندې اومحمود خزان به د ادبي درس برخې ته تيارى ونيسي.
غونډه غرمه مهال پاى ته ورسېده.
د يادونې وړده چې د دې غونډې د برخوالو شمېر په دې تريوې کچې کم و چې د خوځښت د مشر ارشادرغاند په ګډون يوشمېر نورخوځښتوال په پلازمېنه کابل کې ول او هغلته هم د لږ وخت لپاره د افغان ادبي بهير غونډې ته ورعلي ول.
دوى هغلته بهيروال وهڅول چې جلال اباد ته د راتګ پرمهال ترپخوا په ډېره کچه د خوځښت غونډو کې برخه واخلي چې د بهيروالو له لوري په دې برخه کې ډاډ ورکړل شو.