روهي (څلورنۍ/۱۷ د مرغومي)، افغان ولسمشر محمد اشرف غني تېر مازدیګر اداري فساد سره د مبارزې کمېسیون رئیس او غړو سره په ګلخانې ماڼۍ کې وکتل. ياد کمېسيون سره په خبرو کې ولسمشر غني ويلي، چې د موازي ادارو لیست ترتیب کړئ، ترڅو د برخلیک په اړه یې لازم تصمیمونه ونیول شي.
ولسمشر وړاندې زياته کړې، د کمېسیون کاري خپلواکي او د ارزونې صلاحیت باید معلوم وي چې وکولای شي زما د دفتر او د جمهوري ریاست اړوند ادارو په شمول ټولې دولتي ادارې وارزوي.
محمداشرف غني په ټینګار وویل، هغه کسان چې داداري فساد د دوسیو له امله زنداني شوي بیا استخدام نه شي او په اړه یې باید قوانین تغییر ومومي، همداراز کمېسیون باید جمهوررئیس ته د کارکوونکو د تعلیق د وړاندیز صلاحیت ولري.
