د هر څه د مخه خو به دا ووايم چي نه خو زه ليکوال يم او نه هم داسې باسواده يم چې څه دې وليکلای سم خو کله چې مې د محترم اميرالمؤمنين خبرې ولوستې نو افغاني غيرت او د کړيدلي ولس درد مجبور کړم چې قلم راواخلم او يو څو کرښې وليکم:
د اسلام خادم اميرالمؤمنين ملا محمد عمر مجاهد :
لومړی به راسو د دې لقب مانا ، مفهوم او مسوليت ته :
په مانا به يې هر څوک پوهيږي زما په اند او هم يې په مهفوم او مسوليت يې که زه سم تشريح کړم نو دا ليک به ډير اوږد شي نو فقط دونه به ووايم چې حضرت عمرفاروق (ر ض) هم اميرالمؤمنين و تاسې يو وارې د هغه خلافت ته يو نظر وکړی چې هغه په خپل خلافت کې څه کړي دي او څنګه اميرالمؤمنين و. يو مثال يې دا دی چې هغه به د شپې يواځې په خپل ښار کې د غريبانو د حال معلومولو د پاره ګرځيدی اود هر چا سره به يې مرسته کوله،خو تاسې محترم ستاسې د 7 کالو خلافت په موده کې يو وارې چا وهم نه ليدلاست زه خو ستاسې په ټول خلافت کي حتا په کندهار کې وم زه خو ستاسې په ديدن نه يم مشرفه شوی.څنګه اميرالمومنين مو و؟
او د اسلامي امارت څه خو غوجله جوړه سوي وه داسې څه به په کښې کيدل چې په اسلامي امارت او د اسلام په يوه کتاب کي اجازه خو څه چې ځينې به يې بيخي ګناه هم وه.سمه خبره ده لکه تاسې چې په خپلو خبرو کې ويلي دي چې د اسلام امارت يا د طالب په نامه هر څوک هر څه کوي هغه وخت يې هم کول چې په هغو کي يو هم پاکستان هر يو فرد ته معلوم دی چې ستاسې په جامه کي يې په افعانستان کي د اسلام په نامه هغه څه وکړل چې تاسې يې تر اوسه هم سر نه سی راګرځولی او تر اوسه هم د ډيرو افغانانو په زړونو کي د طالب د پاره يو نفرت پروت دی ځکه هر څه چې هغو د طالب په جامه کي کول ستاسې څه پټ نه وه هرڅه ستاسې په مخ کي کيدل خو د مخنيوي پر ځای يې ستاسو له خوا ملاتړ کيدی.
خير دا هر څه خو تير سول که د زغملو و که نه،د هغه يادونه به هم نه کوم چې تاسې محترمينو د يوه سپږې د پاره ټول پوستين اور ته واچاوه،مطلب مې اُسامه دی چې يواځې د هغه په خاطر مو ټوله افغانستان اور ته واچولو،په نوره نړۍ کي هم اسلامي مملکتونه سته ډير ځواکمن مملکتونه سته اُسامه د سعودي دی خپله سعودي د ټوله نړۍ غټ اسلامي مملکت دی ولي يې د هغه حمايه ونه کړه؟
او هم ستاسې ملګرۍ او سلاکار(صلاح کار) مملکت پاکستان چې اتومي ځواک هم دی ستاسو سره د اُسامه حمايه خو څه چې تر ټولو د مخه يې امريکا ته خپلي پوځي هډې او بحر هم په واک کي ورکړه چې د دې ځای څه تاسې پر افغانستان ښه حمله کولای سی خو په هغه هر څه سربيره اوس هم چې ويل سوي دي هغه پاکستان ستاسو ټاټوبی دی او افغان دولت مو دښمن.
زه حيران يم چې تاسې څنګه اميرالمؤمنين ياست چې تر اوسه مو خپل اصلي دښمن ونه پيژنده او ټوله دنيا ته حيران يم چې د دونه پوهې اوپرمختګ سره سره هم نه ويني چې اصلي تروريست څوک دی يا نه غواړي چې پوه سي.
خو خيرد هغو څه خو ګيله نسته ځکه هغوی خو... ګيله خو د خپل څخه کيږي البته که تاسې خپل ياست.
اوس به راسم زما د ليکنې غټ مقصد ته چې ستاسې د کفر سره جهاد دی او تاسې په کښې د افغان ولس ستاسې د جهاد څه ملګرتوب هم غواړی :
نو زه او ټوله افغان ولس ستاسې د جهاد په مفهوم او تګ ﻻر پوه نه يو،دا څنګه ستاسې د جهاد تګ ﻻر ده چې په هغه کي تاسې افغان کمزوری او بې دفاع ولس د خپل ځان سپر ګرځولی دی چې د امريکا يو بمب د لسګونو افغان ولس مرګ ټاکي،ځکه چې تاسې د هغو بېوزلو په کورونو او په پناه ځايونو کي پناه غواړی په زور يې که په رضا،حقيقي مجاهد خو بې واکه او مظلوم ولس ته نه وايي چې زه ستا په کور کي پناه غواړم که په زور يې او که په رضا په داسې حال کي چې افغانستان خپله داسې جغرافيوي حالت لري چې په هر ځای کي د افغانستان د دښمن سره سپيڅلی جهاد کيدای سي.
زه اوس ستاسې جهاد ته د سپيڅلي جهاد نوم ورکړم په هغه کي چې يو کافر او تر 500 هم ډير مسلمانان وژل کيږي؟چې ښه مثالونه يې د نيږدې وخت د کندهار خونړی چاودنه او د کندوز نه هيريدونکي تلفات دي ،که د حضرت محمد مصطفی(ص)هغه جهاد ته د سپيڅلي نوم ورکړم چې په 300 مجاهدينو به د 300000 مسلح کفارو سره جنګيدل او تل به بری هم د دوی وو؟؟؟
دا څنګه جهاد او دا څنګه مجاهدين دي چې خپل يو مجبوره مسلمان ورور سره داسې وحشيانه کړنه کوي چې زما قلم يې د ليکلو څخه معذور دی خو په لنډو تورو به ستاسود مجاهدينو دا يو عمل ووايم دثبوت په توګه:
يو نفر د ډيرې مجبوری څه چې د کوژدې وروسته يې ښځه د خسر په کور کي 5 کاله تيروي دی په دې فکر چې خپله ښځه تر کوره راولي په يوه داسې موسسه کي يو څه وخت کار کوی چې د هيڅ امريکايې يا افغان نظامي اورګان سره به تړاو نه لري ،وروسته د خپل ښځې سره په هغه طالب نکاح تړي او هغه ته وا يي چې ښځه مي کور ته راوستل اوس يو وارې ځم چې خپل بستراو هغه نور څه مي چې هلته پاتې دي راواخلم بيا به هيڅکله ورنه سم.2 شپې فقط د خپلې ښځې سره تير وې او ځي خپل شيان راوړي کله چې بيرته راځي په هغه شپه هغه طالب چې نکاح يې تړلي وه کور ته ورځي هغه د کوره باسي په داسې حال کي چې مور بېوزله يې ملا صيب ته قران عظيم واسطه کوي خو ملا صيب يې مور د قران عظيم سره داسې وهي چې هغه د قران سره لرې غورځي بېوزله هلک د کوره باسي او پر سر يې موټر ورتيروي او بيا يې په مرميو ولي.
نو د يو مسلمان او افغان ورور سره خو دونه وحشت نفرت او په داسې وحشيانه مرګ وژل اسلام نه دي ويلي.
داسې پيښې به هره ورځ څو ځايه صورت نيسي خو د هغه خبر به تر موږ رارسيږي هم نه.
د بخښنې په غوښتلو سره ليکنه راڅخه اوږده سوه ،خو دا هرڅه چې مي وويل د هر افغان د زړه د ګوټ يوې نقطې په شان درد دی که داسې هر افغان خصوصاً پښتانه خپل زړه د کاغذ پر مخ وسپړي هپڅ څوک به يې هم د لوستلو يا اوريدلو زغم ونه لري او هغه به ټوله هغه څه يي چې افغانانو به په خپلو سترګو يا هم خپلو ځانو باندې مشاهده کړي يي.
افغان ولس اوس هم هغه ولس دی کوم چې د روسانو او انګريزانو په وخت کي و افغان ولس اوس هم هغه مجاهدين او د مجاهدينو حمايت کونکی دی کوم چې په هغه وختو کي وه خو البته د حقيقي مجاهدينو حمايه کونکی.
تاسې فکر وکړی څوک د چا سره جنګيږي او څوک وژل کيږي؟طالب د افغان دولت سره ،طالب افغان دولت ته د توپک په خوله وايې چې اشغالګر وباسه او افغان دولت هم همداسې ځواب ورکوي چې نه يې باسم چې ستاسې دا وحشت يي او وژل کيږي بيا هم افغان او افغانان.
په دا ډول کړنو به د افغانانو او طالب او افغان دولت تر منځ هيڅ کله تفاهم رانه سي نو يوه دا توصيه کوم چې تفاهم په توپک او سوله په وحشت او نفرت نه کيږي.
او اميرالمؤمنين صيب تاسو ته که تاسې ريښتيا جهاد کوی نو دا جهاد داسې مه کوی چې د افغانانو او بېوزله ولس د سر د ساتنې پر ځای تاسې د هغو د وژنو ﻻمل وګرځېږې. جهاد ته مو داسې تګلاره جوړه کړی چې مظلوم ولس په کښې برباد نه بلکې په ارام سي،بيا به نو حمايه بری او وطن ته ﻻر پيدا کړي که نه نو د افغانستان راتلونکي به تر دې هم دردناکه يي خدای مه کړه.
افغان دولت که د افغانستان يو ﻻس دی نو طالب د افغانستان بل ﻻس دی خو د يوه جسم دا دوه غړي يو د بل سره تفاهم نه سي کولی افسوس.
د يو متحد،اباد او سوکاله افغانستان په هيله!
