په کابل کې جنسي غونډې او په کندوز کې افغان وژنه
سره د دې چې اوباما واک ته ورسيده خو دنوموړي هغه وعدې چې نړۍ او په ځانګړې توګه ته امريکايانوته يې ورکړې وې چې تغير به راولي ټولې دشعار په بڼه پاتې شوي په عملي ميدان کې يې دپلې کيدو هيڅ څرک نه لګيږي . دسيپټمبر په ۳ مه نيټه رسنيو داسې انځوريز رپوټونه خپاره کړل چې په کابل کې دامريکا سفارت د ساتوونکي کمپنۍ غړي پکې په داسې حالت کې ليدل کيږي چې يو لړ افغانان ور سره دجنسي کړنو او شرابو د څکلو په حالت کې ليدل کيږي، چې دغه صحنه سمدستي دسړي ذهن ته په عراق کې دابوغريب دزندان او د بلاک واټر دکمپنۍ کړنې دروي . د نويو شرموونکو کړنو د پټولو لپاره دباراک اوباما ادارې سمدستي د دغه کمپنۍ د ۱۴ غړو دشړولو اعلان وکړ او اعلان يې وکړ چې امريکايې چارواکې په دې فکر کوي چې په کابل کې د امريکا دسفارت دساتنې دنده بل چا ته ورکړي.
په کابل کې دامريکا سفير ويلي ، چې په دې برخه کې مو لومړني ګامونه پورته کړي ۱۴ کارکوونکي چې دارمو ګروپ له کمپنۍ سره تړاو لري له دندو ګوښه شوي د دې تر څنګ مو په پيښه کې دښکيلو کسانو په اړه ځينې اداري تدابيرهم نيولي دي ، خپله دارمو ګروپ کمپنۍ هم منلې ده او په دې اړه يې دتحقيقاتو د پيل خبر ورکړی . ورته پېښې په افغانستان او عراق کې نوي نه دي .په تير جون کې هم بي بې سي راډيو اعلان کړی و چې دبګرام په هوايي ډګر کې له بنديانو سره ناوړه چلند کيږي دوي وهل کيږي ،خوب ته نه پريښودل کيږي په سپيو ګواښل کيږي ، همدارنګه له دې ډيرسخت چلند سره هم کله کله مخامخ کيږي ، کله ډيرې يخې او کله ډيرې ګرمې هوا ته وړاندې کيږي ، دښځينه امريکايي سرتيرو پروړاندې لوڅول په مرګ ګواښنه او.... هغه کړنې دي چې زندانيان ورسره مخامخ کيږي .
د دې ترڅنګ د سکې بل مخ اوباما د بوش په څير په افغانستان کې خپل ځواکونه له دې راونه ګرځول چې په بې ګناه افغانانو نور دغه ړنده بمباري ودروي ، دسپټمبر په ۴ مه نيټه د رمضان په مياشت کې دهمدغه ړندو بمباريو په پيله کې د کندوزپه ولايت کې نږدې ۹۰ تنه بې ګناه افغانان شهيدان شول او پاتې کسان يې ورته دغم پر ټغر کينول ، چې نړيوال ځواکونه ورته دا دليل نيسي چې دوی له هغه ټانکرونو تيل وړل چې له طالبانو له خوا تښتول شوي و، په دې مانا چې دوی غله ول او دوی بايد ووژل شي . خو خير افغانان دامريکايې ځواکونو له ورته څرګندونو سره بلد دي او نه دا دوي لومړنۍ تيروتنه ده بلکې په لسګونو ورته پيښې شوي او قربانيان يې بياهم بې ګناه افغان ولس دی
