شاغلو سميع حق او مجاهد صاحب
بس ده د خدای په خاطر نور ددې بې ګناه او بې وزله پښتنو ټولوژنه بنده کړئ. تاسو د اسلامي امارت استازي ياست نو اجازه راکړئ چې د همدې امارت په استازيتوب درنه يوه پوښتنه وکړم
تاسو چې له تېرو نهو کلونو راهيسې کومه مبارزه پيل کړې نو هره ورځ په ډېر وياړ سره واياست چې فلانی انجينر مو وواژه، ښوونځی مو وسوځاوو، روغتون مو وران کړ او د بې وزلو پښتنو پر وړاندې مو د علم او پرمختګ دروازې بندې کړې خو هيڅکه مو درنه د خير او ښيګڼې د کوم کار په اړه وانه ورېدل
بهرنيان خو هسې هم کفار دي زموږ د دين، کلتور او عقيدې دښمنان دي، هغوی خو راغلي د دې لپاره دې چې موږ ووژني، ولې تاسو خو ځانونو ته مسلمانان واياست تاسو ولې بې ګناه پښتانه وژنئ، کورونه يې ور ورانوئ او د هغوی په سيمه کې د هر پرمختګ مخه نيسئ
تاسو همېشه کوښښ کوئ چې په داسې پېښو کې قصداً او عمداً عام خلك ووژل شي او په دې توګه له دې ډول پېښو څخه د تبليغاتي جنګ په توګه كار واخلئ او بيا په خپله خواشيني هم وښاياست. ډېر د افسوس ځای دی چې هم مو وژنئ او هم راباندې ژاړئ
افغانان په هر حال كې وژل كېږي، كله ستاسو په حملو كې، كله د نړيوالو ځواكونو په بمباريو كې او كله د افغان سرتېرو په ډزو کې. په هر حال كې د افغان وينه تويېږي او تاسو ورته خوشحاله ياست
تاسو چې کله له يو پښتون سره ليپ ټاپ کمپيوټر ووينئ نو اور درباندې بل شي او په منډه يې د وژنې امر کوئ خو په دې خبر نه ياست چې د KGB جاسوسان همدا اوس د چيچنيايي مجاهدينو کې په بڼه ستاسو په ليکو کې په چاردره، امام صاحب، علي اباد او دشت ارچي ولسواليو کې له خپلو ليپ ټاپ کمپيوټرونو د جاسوسي سامان الاتو سره تيار ناست دي او ستاسو جاسوسي کوي خو تاسو په دې خوشحاله اوسئ چې جهاد کوئ او په پښتنو مو اور بل کړی
په دشت ارچۍ ولسوالۍ کې يو طالب کليوالوته په ډېر فخر سره ويل چې: (اوس خو مو اور درته بل کړی، که راسره درېږئ ودريږئ او که نه نو موږ خو به ولاړ شو خو غم به تاسو ته پاتې وي) دا ستاسو پوهه او تدبير دی
الله ج پاک مو داسې تباه او برباد کړه لکه پښتنې ميندې چې مو بوري او بې اولادونو کړې
الله ج پاک دې د هغو بې وزلو يتيمانو غچ درنه واخلي چې په ځانمرګو بريدونو کې مو بې پلاره کړل
تاسو خو بيخي اسلام وشرماوه، يو څوک د جاسوسۍ په تور ونيسئ او اعلان وکړئ چې جاسوسي يې کوله خو چې کله يو لک ډالر درکړي نو بيا پاکه فرشته شي او بيرته يې خوشې کړي. دې ته وايي جهاد. الله پاک به د پنجاب ټول هغه غلامان وشرموي چې د اسلام په سر تجارت کوي.
تاسو په دې وپوهېږي چې که په افغانستان کې روانه جګړه د پاکستان ګټو ته خطر پېښ کړي نو په والله کې يوه ورځ هم په کوټه او پېښور کې داسې په ارام وګرځئ
ډېر د افسوس ځای دی، هغه دوستم چې د زرګونو طالبانو قاتل دی هيڅ ورته نه واياست. فهيم، يونس قانوني، ډاکټر عبدالله، برهان الدين رباني، جنرال مالک، امرالله صالح، محقق او کريم خليلي چې د ټولو يهودانو د استخباراتي شبکو ګوډاګيان او د اسلام دښمنان دي سرې سترګې ګرځي خو پښتون بايد زده کړې ونکړي، ارام ژوند ونلري، ډاکټر نشي، انجينر نه شي، کانديد نه شي د رايې حق ونلري او حتی ژوندی پاتې نه شي.
الله ج دې درته هدايت وکړي چې نور خپل دوست او دښمن وپېژنئ او کنه نو الله مو د پښتنو د هغو دښمنانو په څېر برباد کړه چې د تاريخ په اوږدو کې د پښتنو پر وړاندې پر ګونډو شوي دي
امين ثم امين
ميوند افغان
