انا لله و انا الیه راجعون
هاشمزاده، د هیواد د ازادۍ د لارې اتل شهید :
نن یوځل بیا د هیواد په ازادۍ مین ، نامتو او تکړه خبریال ،ژورنالست او لیکوال ، دروند جان الله هاشمزاده د یوشمیر نامعلومو کسانو له اړخه په داسې حال کې په شهادت ورسید چې د خپل کار په لورې روان و . انا لله و انا الیه راجعون .
شهید جان الله هاشمزاده د هیواد د ازادۍ او استقلال په لاره کې یو ولاړ او ټینګ سنګر و . په ګران هیواد د روسانود سرولښکرو د تیري او د اشغال په وخت کې ځوان هاشمزاده چې نوې نوې خبري رسنیو او ژورنالیستکي بهیر سره یو ځاې شوې و د خپل ټاټوبي د ازادۍ او د هیواد د سرلوړۍ له پاره شپه او ورځ نه هیریدونکي خدمتونه تر سره کړي ، هیڅکله هم ګواښونو ته نه و تسلیم شوې او اوس چې په خپله دنده کې یې پوره تجربه پیدا کړې وه نو په پوره مټ او متانت سره یې د هیواد د سیاسې استقلال ددښمنانو په مقابل کې خپلې قلمې مبارزې ته دوام ورکړ .
په داسې حال کې چې شهید هاشمزاده له هیچا سره شخصې دښمنی نه درلوده ، د ټوپک په ځاې یې قلم په لاس کې و او د خپلو مظلومو هیوادوالو د غږ د پورته کولو له پاره یې هیڅ ګړۍ له لاسه نه ورکوله نود هیواد د ازادۍ او استقلال ددښمنانو په سترګو کې تل پاتې اغزې ګرځیدلې و نودا دې د همدې ډول دښمنانو نښه وګرځید.
دا په داسې حال کې چې زمونږ هیوادیو ځل بیا د بهرنیو نیواکګرو په لاسو د یو ستر تاریخي ازمیښت څخه تیریږي او هیوادوال مو د ډیرو بدو ستونزو سره لاس وګریوان دي او هره ورځ په کې د بې وزلو او مظلومو انسانانو وینی لکه د اوبو په څیر پریمانه بهیږي ، دځوان جان الله هاشمزاده پاکو وینو دغه غمیزه نوره هم غم لړلې کړه .
هیوادوال باید په یاد ولري چې زمونږ د ولس سوګند خوړلي دښمنان غواړي زمونږ د ولس دغسې روڼ اندی، په ازادۍ مین جوړونکې وګړي او شخصیتونه له منځه یوسي .
زه په داسې حال کې چې دشهید ویرجني کورنۍ ته د دروند او اتل شهیدد شهادت په هکله د زړه له کومې دمخلوقاتو د پیداکونکی د ستر ذات څخه د زړه صبر او اجر غواړم د پژواک د خبري اژانس او ټولو هغو خبرې ارګانونو او ورځپاڼو ته چې شهید ورسره نژدې همکاري درلوده ، د زړه له کومي تسلیت وړاندې کوم. روح دې یې ښاد وي .
قریب الرحمن سعید
د حزب اسلامي پخوانې ویاند او د افغان خبری اژانس پخوانې مشر .
۲۴ اګست ۲۰۰۹
