حامدکرزي ته د عمران خان بلنه: افغانستان په اړه ځانګړی کنفرانس جوړوم؛ پاکستان ته راشه

د پاکستان لومړي وزير عمران خان د افغانستان له پخواني ولسمشر حامد کرزي سره د افغانستان د روان وضعیت په اړه ټيلفوني خبرې کړي او حامد کرزي ته يې پاکستان ته د ورتګ بلنه ورکړې ده. 

د پاکستان جيو نيوز خصوصي رسنۍ د ياد د اطلاعاتو وزير فواد چوهدري د مالوماتو پر بنسټ لیکلي دي چې لومړي وزير عمران خان د افغانستان له پخواني ولسمشر حامد کرزي غوښتي دي چې حکومت يې د افغانستان په اړه ځانګړی کنفرانس نيسي او غوره به وي چې حامدکرزي هم په کې ګډون وکړي. 

د پاکستان د اطلاعاتو او نشراتو وزير فواد چوهدري هم پر خپل ټوېټر پاڼې لېکلي، "د افغانستان د سولې او ارامۍ لپاره د پاکستان هڅې جاري دي. پاکستان د افغانستان د وضعیت په اړه ځانګړې ناسته نيسي او په اړه به يې جزئيات ژر رسنيز شي."

پخواني افغان ولسمشر حامد کرزي هم له عمران خان سره د ټيلفوني اړيکې ويلي او پر خپلې فېسبوک پاڼې يې لیکلي دي، "د افغانستان پخواني جمهور رئیس حامد کرزي چهارشنبې ماښام د پاکستان له صدراعظم ښاغلي عمران خان سره تلیفوني خبرې وکړې. 

په دغو خبرو کې د سولې د جدي او اغېزمنو خبرو د بیا پیل او د افغانستان او پاکستان ترمنځ د نېکو او حسنه روابطو د ایجاد په باب د نظر تبادله وشوه او په همدې هدف ښاغلي عمران خان د افغانستان پخواني جمهور رئیس ته، پاکستان ته د ورتگ بلنه ورکړه. 

حامد کرزي د دې ترڅنگ چې د پاکستان د صدراعظم له تلیفوني اړیکې او بلنې مننه وکړه، د دواړو هېوادو ترمنځ د ښې او متمدنې اړیکې  ټینگېدل یې د دواړو ملتونو په گټه او دسیمې د سولې او ثبات لپاره لامل وباله."

ويل کيږي چې پاکستان د افغانستان په اړه دغه جوړېدونکې ناسته ته صلاح الدين رباني، محمد محقق، محمد کريم خليلي، حضرت عمر زاخيلوال او يو شمېر نورې سياسي څېرې هم بلنه کړې دي. 
 



تبصرې

تبصرې نشته

خپله تبصره مو ولیکئ

تاسو دغه لیکنه شریکولی شئ!

د لیکوال نورې لیکنې
Loading...