د افغانستان سترہ بدبختي او غمیزہ کانونه، اوبه او د گران ھېواد ستراتیژیک موقعیت دی ( خپل ښایست ورته بلا دی ) چې نه یې نړیوال زغملای شي او نه ھم د سیمي ځیني ھېوادونه په ځانگړي ډول گاونډیان! خو خدای ورته لېوان د انسانانو په پوستکي کې ورکړیدي.
افغانستان د امیر غازي امان الله خان په وخت کې لا د ریل پټلۍ لرله، مونږ د والا حضرت محمد ظاھر شاہ په وخت کې نیمروز کې د ریل پټلۍ تېروله چې ایران لا په تھران کې دا امکانات نه لرل، پنجاب خو لا اصلا پیدا شوی نه و، چې افغانستان کانالونه، لوی لارې، ریل پټلۍ او نړیوالې اړیکې پاللې، خو د بدہ بخته چې له یوې خوا مو مشران د نورو په لومو کې بند پاتې شول او له بلې خوا گاونډیو د افغانستان ورانولو ته گونډہ ووھله او یوازې د خپل گاونډي پر وھلو او ځپلو یې منگولې خښې کړې.
انگرېزانو خو ھان د والا حضرت امیر امان الله خان په وخت کې حبیب الله کلکاني (بچه سقاو) په کرایه واخیست او د وخت مترقي خواہ غازي امیر حکومت یې پرې ړنگ کړ؟
که څه ھم چې افغان ولسونو وخت پر وخت د جواسیسو، ظالمانو، پردیپالو او پردیو پر وړاندې کارنامې کړیدي، خو ھر کله چې ھېواد دېته امادہ شوی چې د پرمختگ پر لور گام پورته کړي د پردیو په ځانگړي ډول ھمدغه دوہ گاونډیانو له لوري یې مخته خنډونه جوړ شوي او یو پر بل پسې را نسکور کړیدي، په دې برخه کې د روسانو لاسوھنه ھم په ھیڅ ډول د بخښلو او ھېرولو نه دہ.
تېر څلوېښت کلن ژوندی تاریخ خو د ھر افغان په یاد دی چې دواړہ گاونډیو، لرې او نږدې پرتو نورو ھېوادونو پر گران ھېواد ھرہ نادوده وکړہ.
او بدبختي دا دہ چې افغانان د دښمن په دا دومرہ چل، فریب او نیرنگ ھیڅ سر نه خلاصوي؟
یو مار دی چې د ھماغې یوې سوړې بیا بیا خوري او دغه کار په بار بار تکرارېږي۰
د گران ھېواد دښمنانو د اسلام له مبارک دین څخه وسیله جوړہ کړېدہ، تېکی یې خپلو حلقه بگوش افغانانو ته په لاس ورکړی او تیغ یې د ھېواد پر اصیلو، ملتپالو، وطنپالو او حقیقي مسلمانانو ورسم کړيدی او پر ھمدغه وسیله مو کابو یوہ سلیزہ کېږي چې وژني.
آخر تر کومه۰۰۰؟
نوی لوبه چې پنجاب پکې تقریبا بریالی بریښي او تازہ په تازہ ایران ھم دغه منجلاب ته د کوزېدو لپارہ د بوټونو مزي ټینگوي، په افغان سوله کې د جنگ، جگړې لپارہ خلی وھي؟
دوی غله ته وایي غلا وکړہ او د کور خاوند ته وایي بېدارہ اوسه، له یوې خوا افغان حکومت ته تازہ په تازہ د وسلو اخیستو لپارہ مرستې ورکوي او بلې خوا د نظام وسله والو مخالفینو ته د کرښې ھاغاړہ، تجھیزات برابروي، تمویلوي او په ښکارہ او پټه یې ھر اړخیز ملاتړ کوي؟
دوی له افغان حکومت څخه د احسان نه ډکو خبرو، چې زرہ عمل پکې نه برېښي باج اخلي، په ھېواد دننه ځیني اشخاص او افراد په مالي لحاظ مشبوع کوي او جگړہ مار خو ھسې ھم ساتي، چې په بدل کې ایران د ھېرمند (ھلمند سیند) اوبو ته ځان غلی کړی او پنجاب د ډیورنډ رسمیت پېژندلو ته؟؟؟
پنجاب ځکه لوبه کې بریالی ښکاري چې دوی پر ډیورنډ ازغن سیم وځغلاوہ، اته دروازې جوړې کړې په زرھاو چوڼۍ او په سلگونو غټې جنگي کلاوې ډیورنډ ته څېرمه جوړې کړې، د فاټا، ایجنسیو قبایلي سیمې د پوځ په واک کې واخیستې، ۱۲ واړہ او لوی بازارونوه جوړوي او تقریبا څلور مھم سندونه یې د شته حکومت پر مشرتابه لاسلیک کړل، له بدہ بخته چې په ھغې کې د ډیورنډ پر سر ځیني توافقات، بلوڅ ازادي غوښتونکو، د تحریک طالبان پاکستان مشرانو شھیدانول او د افغانانو قاتلین له بند خونو ازادول شامل دي.
ایران چې د فرھنگي یرغل ترڅنگ نظامي ھڅې کولې او د وخت حکومتي مشران یې د تورو او سپینو کڅوړو په بدل کې اخیستل؛ اوس ښکارہ او په بې شرمانه توگه د خپلو لاسوھنو او په ھېواد دننه لاسپوڅو له ھمکاریو پردہ پورته کوي.
جواد ظریف څو ورځې وړاندې په افغانستان کې د یوہ خصوصي تلویزیون سرہ په مرکه کې د ایران څو بعدي رول دومرہ په مھارت سرہ تشریح کړ چې یوازې سرخلاصي خلک یې درک کولای شي، ھغه نه د فاطمیون له جوړولو انکار کاوہ، نه یې د ایراني پوځي چارواکو لکه قاسم سلیماني له لاس وھنو انکار کاوہ، نه یې د طالب مشرانو له تماسونو انکار کاوہ او نه یې ھم د شمال ټلوالې سرہ له ھمکاریو انکار کاوہ بلکه په ډېرہ سپین سترگۍ یې د خپلو دغه بې شرمانه کړنو څخه دفاع ھم کوله.
د ایران او پاکستان (پنجاب) اوسنۍ لوبه یو اړخیزہ ندہ بلکه په څو اړخونو کې د میدان توپ لوبوي، پنجاب د طالب ترڅنگ بھرنیو جنگیالو ساتلو، تجھیزولو، تمویلولو او جنگولو ترڅنگ افغان حکومت سرہ ھم سخاوتمندانه مرستې کوي او په دې کار سرہ افغانانو او نړیوالو ته ښایي چې مونږ د افغانستان د ثبات لپارہ کار کوو، په ھمدې ډول ایران ھم در واخله.
که ټوله لیکنه په څو ټکو کې تشریح او ستاسو درنو زھن ته په خلاصه ډول وړاندې کړم، کولای شم چې ووایم:
((که افغانستان یوې ونې ته تشبیه کړو، پنجاب (پاکستان) یې ښاخونه پرې کوي او ایران یې رگونو پسې تبر را اخیستی او د بېخه یې اوباسي ))
پس ملتپاله، ھېوادپاله او ھغه افغانان چې پر وطن او دغه ځورېدلي ولس یې زړہ خوږېږي، ځان د خاورې اصیل وارثین او بچي بولي په کار دي چې، یووالی وکړي، ھوښیار شي او د ھېواد پر وړاندې د را روان بد ناورین پر وړاندې ھرې راتلونکي بدبختۍ ته پورہ تیاری ونیسي د فرصتونو گټه پورته کړي او د ھېواد دغه ډوبېدونکي کښتۍ سمه سلامته تر ساحله ورسوي.
