روهي (يوه نۍ/۲۰ د تلې)، د حکومت د سولې عالي شورا مشر ډاکتر عبدالله عبدالله په يو درې ورځني سفر د هندوستان پلازمېنې نوي ډيلي ته تللی وو. نوموړي نوي ډيلي کې د افغانستان د سولې بهير په اړه له يو شمېر هندي او بهرنيو رسنيو سره خبرې - اترې کړې.
نوموړي له هندي اې اِن آی رسنۍ سره په خبرو کې ويلي دي چې د سولې بهير څخه موخه دا نه ده چې له ۲۰۰۱ کال وړاندې په څېر به افغانستان کې د طالبانو امارت جوړ شي، بلکې طالبان به د افغان ولس يوه برخه جوړيږي.
عبدالله عبدالله دا هم ويلي دي چې که چېرې له وخت وړاندې بهرني ځواکونه له افغانستان ووځي، نو افغانستان کې به د قدرت تشه يا خلا رامنځ ته شي، خو له وخت وړاندې د بهرنيو ځواکونو وتل د طالبانو په ګټه هم نه دي.
عبدالله عبدالله دا څرګندونې په داسې وخت کې کړې دي چې له تېرو لسو ورځو کې دوحه کې د سولې بين الافغاني خبرې هم ځنډېدلې دي. د سولې پر بین الافغاني خبرو نېږدې يوه مياشت وخت تيريږي، خو ښکېلې غاړې تر اوسه کومې څرګندې هوکړې ته سره نه دي رسېدلي.
