روهي (درې نۍ/۱۰ د چنګاښ)، د کرونا ويروس سره د مبارزه برخه کې د کابل ښاروالۍ له خوا د لګول شوې پيسو د سپيناوي په اړه ولسي جرګې کابل ښاروال محمد داوود سلطان زوی ورِوښتی وو خو نوموړي ګډون ونه کړ.
داوود سلطان زوی د يو مکتوب له لارې ولسي جرګې ته ليکلي چې د کابينې په ناسته کې بايد برخه اخلي او نه شي کولی چې ولسي جرګې ته ورشي، نوموړي لېکلي چې د ولسي جرګې په نورو ناستو کې به برخه واخلي.
د کابل ښاروال دغه ځواب د ولسي جرګې د يو شمېر غړو غوسه راپورته کړې او ويلي دي چې کابل ښاروال د کابينه غړی نه دی او له ځانګړو ناستو پرته د کابينې په ناستو کې برخه نه اخلي.
وکيلانو کابل ښاروالي د کرونا ويروس سره د مبارزې لپاره د ځانګړي شوي پيسو په فساد تورنه کړې او ولسي جرګې ته د داود سلطانزوی نه ور تګ يې بهانه بللې.
