
زمونږ او ستاسې په ټولنیز ژوند کې هم که چیرته مونږ او تاسې پلان ونلرو حتا د یوه انسان ژوند هم کډوډ کیږي او په سمه پر مخ نه ځي، خو چې بیا راشو د هیواد په سطحه مسایلو ته نو هلته خو بیا لازمه او اړینه ده چې پلان باید وجود ولري زیاتره وخت کله چې پلان جوړول کیږي په دریو برخو ویشل کیږي چې لومړۍ، دویم او دریم پلانونه وي یعنې له عمل وړاندې داسې سنجول کیږي چې که چیرته دا کار کامیاب نه شو دا کار به کوم او ورپسې وروستۍ یې.
اوس که راشو پاکستان هم د خپل ترتیب شوي پلان په وروستۍ پوړۍ کې قرار لري او که چیرته دا هم ورته د امریکا له لوري ختم کړئ شو په دې پوه شئ چې دا هیواد به په رښتونې ډول د ګډوډي سره مخ شي.
نوموړی هیواد اوس په رښتونې مانا هغو متحدینو وپیژانده چې یو وخت یې ځان ته تر ټولو نږدې باله ځکه اوس هغوي په دې پوه دي چې په رښتیا دا هیواد فساد لري او په یو نه یو ډول نوموړی هیواد د نورو لپاره ستونزې جوړوي چې ښه مثال یې چین یادولای شو په اوسنیو بدو ورځو کې چې پر پاکستان راغلی دي نوموړی هیواد هیڅ ځان لدې مسایلو نه خبروي، همداشان یوه وخت یې د روسیې سره هم د امریکا پر خلاف ګډ پوځي تمرینات کول او دا یې د امریکا لپاره پیغام ورکاوو چې دا هیواد کولای شي د داسې هیواد سره لاس یو کړي چې د امریکا سر سخت دښمن وي مګر روسیه تاسې ګورئ چې د پاکستان اړوند خبرو کې چپ ده او هیڅ نظر نه ورباندې ورکوي.
پاکستان اوس په یو داسې حالت کې قرار لري چې یواځې یې د نړیوالو پلانونو پر وړاندې دفاع ته لاس اچولې او اوس د فساد خپرولو پر ځای غواړي چې کوم لوي شیطانان چې ده په خپل کور کې ځای ورکړی وو او د نورو د ځپلو لپاره یې پالل په خپله اوس په ده راتاو شوي دي او په یوه داسې جال کې یې راګیر کړی چې ترې وتل به یې ډیر ستونزمن وي.
پاکستان غوښتل چې افغان دولت د مهاجرینو پر بیرته راتګ وډار کړي ځکه چې دوي داسې انګیرله چې افغان دولت به ددې خبرې په اوریدو دوي ته ووایي چې تاسې یې باید تر یوه څه وخته هملته پریږدئ مګر داسې ونه شول افغان دولت ورته وویل چې په کابل کې له یو شمېر مرستندویانو سره د دې لپاره بېړنۍ غونډه جوړه شوې ده، که افغان کډوال هېواد ته ستانه شي مرستې ورسره کېدای شي.
دا یې یوه موضوع حل، همداشان امریکا پاکستان تورن کړی وو چې په دغه هېواد کې مېشت سخت دريځي په افغانستان او هندوستان کې پر خلکو حملې کوي.
ددې خبرې د سپیناوي په خاطر یوه ډله هغه دیني علما چې د پاکستان د استخباراتو له لوري رامنځته شوي ویلي چې ځانمرګي بریدونه حرام دي.
دا خبره یې یواځې ددې لپاره کړې چې دوي نړۍ ته وښايي چې په پاکستان کې مېشت دیني علما داسې نظر لري او دوي د جنګ جګړې پلوي نه دي یواځې دا کار ددې په خاطر شوی چې امریکا ته ځان په دې خبرو ورنږدې کړي او دا د نوموړي هیواد د دفاعي پلان وروستۍ مرحلې دي.
همداشان د پاکستان لپاره یوه لویه بله بدبختي ورځ تر بلې مخ په غټیدو ده هغه دا چې ورځ تر بلې یې مخالف هیوادونه زیاتیږي او ددوي په خلاف څرګندونې کوي چې ښه بېلګه یې د اسرائیل صدراعظم بنیامین نتانیاهو او د ملګرو ملتونو دریځ یادولای شو.
نو په لڼده توګه ویلای شو چې پاکستان یوه قوي سیلاب پر مخه کړی چې اوس مڅه کوي چې ډیر ګوچنی تار هم وویني ځان ورپورې تکیا کړي خو تم کیدل او اصلي حالت ته راتګ به یې ډیر ستونزمن وي او هڅه کوي چې له هرې ممکنه لارې استفاده وکړي تر څو دداسې بد حالت څخه وژغورل شي.