د برتانيې يو شمېر رسنيو نن مازېګر د بېړنيو خبرونو په خپراوي سره وويل چې د هېواد ځواکونو يې د امريکايي او افغان پوځيانو په ملتيا د افغانستان د هلمند په نادعلي ولسوالۍ کې د تور شهزاده په نامه درانه پوځي عمليات پيل کړي. رسنيو د عملياتو د پيل وخت د جمعې سهارښودلى او ويلي يې دي چې پر څلورنېم سوو برتانوي او دوه سوو ځانګړو افغان ځواکونو سربېره يو شمېر امريکايي سرتېري هم پکې برخه لري. په دې عملياتو کې لا د اوښتو تلفاتو کوم رپوټ نه دى خپورشوى خو د برتانيې دفاع وزارت يې په پخلي سره ويلي چې دا عمليات به د جوړشوي پلان له مخې پرمخ لاړشي. افغان چارواکو او دغه راز وسله والو طالبانو لا په دې اړه لا رسنيو ته څه نه دي ويلي.
ليكوال: رغاند / نېټه: 30.07.2010 / خپرونكئ: رغاند / 
